Ulttyq qorǵanys ýnıversıtetin bitirýshiler ofıtserlerdiń qataryn tolyqtyrdy
ASTANA. 18 maýsym. QazAqparat - Búgin Qazaqstannyń Ulttyq qorǵanys ýnıversıtetinde oqý ornyn bitirip shyqqan kezekti tyńdaýshylardy shyǵaryp salý saltanaty boldy,
dep habarlady Qorǵanys mınıstrliginiń baspasóz qyzmetinen. Bıylǵy 60-tan astam bitirýshi túlek oqý ornyn «Áskerı jáne ákimshilik basqarý», «Áskerı bilim», «Tehnıkalyq qamtamasyz etýdi basqarý», «Tyldyq qamtamasyz etýdi basqarý», «Tárbıe, áleýmettik-quqyqtyq úderisterdi basqarý» mamandyqtary boıynsha «Magıstr» akademııalyq dárejesimen támamdap otyr. Olardyń arasynda tórt ofıtser oqýdy úzdik bitirdi. Olar - podpolkovnıkter Rýslan Kókishev, Jandar Áshirbekov jáne maıorlar - Sergeı Arystanbaev, Murat Shaqaev.
Aıta ketý kerek, bul oqý ornynda tek Qorǵanys mınıstrliginiń ofıtserleri ǵana bilim almaıdy. Munda basqa da áskerler men áskerı quralymdardyń ókilderine de oqýǵa múmkindik jasalǵan. Ujymdyq qaýipsizdik sharty uıymyna kiretin kórshiles Tájikstan Respýblıkasy men Qyrǵyz Respýblıkasynyń áskerı qyzmetshileri de osynda oqıdy.
Ulttyq qorǵanys ýnıversıteti Qazaqstan Respýblıkasy Qarýly Kúshteri Áskerı akademııasynyń bazasynda qurylǵan.
Bul joǵary oqý ornynyń búgingi tańdaǵy negizgi mindeti - áskerı mamandarǵa magıstratýra, adıýnktýra boıynsha ǵylymı-pedagogıkalyq joǵary áskerı bilim berý bolyp tabylady. Sonymen birge, joǵary áskerı bilimdi mamandardyń biliktiligin arttyrý, olardy joǵary akademııalyq kýrstarda kýrstyq daıyndyqtan ótkizý, áskerı ǵylym salasyndaǵy ǵylymı izdenisterge jaǵdaı jasaý da bar.
Ulttyq qorǵanys ýnıversıteti Ortalyq Azııa aımaǵyndaǵy ofıtserlerge joǵary áskerı bilim beretin, Qarýly Kúshter men basqa da áskerler men áskerı qurylymdar úshin mamandardy qaıta daıyndaýdy júzege asyratyn birden-bir oqý orny.
