Ulttyq qorǵanys pen qaýipsizdikti nyǵaıtý áskerı bilimdi damytýǵa baılanysty - Elbasy
ASTANA. QazAqparat - Elbasy Nursultan Nazarbaev álem elderin jahandyq qaterge qarsy kúshterdi biriktirýge shaqyrdy. Bul týraly Prezıdent búgin Otan qorǵaýshy kúnine oraı ótip jatqan merekelik shara barysynda aıtty.
«Jalpyǵa birdeı beıbitshilik berik ári senimdi túrde barlyq halyqtar men elderdi qorǵaıdy. Sondyqtan da Men halyqaralyq qoǵamdastyqqa «Álem. HHІ ǵasyr» manıfesin joldadym. Ony sizder bilesizder. Bul óz kezeginde jahandyq soǵysqa qarsy kúshterdi biriktirýge, ózin-ózi joıý qaterinen adamzatty qutqaratyn sharalardy qabyldaýǵa úndeý. Osy másele Semeı ıadrolyq synaq polıgony jabylýynyń 25 jyldyǵy qarsańynda aıryqsha ózekti», - dedi Prezıdent.
Elbasy ıadrolyq qarýdy qoldaný múmkindigi ǵalamsharǵa erekshe qater týdyratynyn aıta kele, «árbir adam bul qaýipti túsinýi tıis, sebebi ıadrolyq qarýsyz álem ǵalamshardaǵy barsha adamdardyń basty isi bolýda», - dedi.
Sonymen qatar Memleket basshysy ulttyq qorǵanysty, qaýipsizdikti nyǵaıtý kóbinese áskerı bilimdi damytý, áskerlerdiń moraldy-saıası rýhyn kúsheıtý maqsattaryna baılanysty ekenin atap ótti.
Bul turǵyda Prezıdent búginde Qazaqstan halqy Assambleıasy qabyldaǵan «Máńgilik El» patrıottyq aktisiniń negizinde Qarýly Kúshterdiń jeke quramymen tıisti jumysty qurý mańyzdy bolyp tabylatynyn jetkizdi.
«Barshańyzdy beıbitshilikti baǵalaýǵa, tatýlyq pen turaqtylyqty saqtap, nyǵaıtýǵa úndeımin. Uly Dalamyzdyń shebi bútin, shekarasy berik bolyp, tynyshtyqqa bólene bersin! Baıraǵymyz bıikte jelbirep, dańqymyz arta bersin!» - dedi N. Nazarbaev.
