Ulttyq qorǵa jyl basynan beri 3,4 trln teńge tústi

NUR-SULTAN. QazAqparat – Munaı baǵasynyń edáýir ósýinen Ulttyq qorǵa túsimder kóbeıdi. Bul týraly QR Ulttyq banki tóraǵasynyń orynbasary Aqyljan Baımaǵambetov málim etti, dep habarlaıdy QazAqparat tilshisi.

«Jalpy, halyqaralyq rezervter bıylǵy shildeniń sońynda 85,9 mlrd dollar, onyń ishinde QR Ulttyq bankiniń altyn-valıýta aktıvteri – 32,8 mlrd dollar, Ulttyq qordyń aktıvteri – 53,1 mlrd dollar boldy. Respýblıkalyq bıýdjetke 3 trln teńge transfert bólý úshin bıylǵy 7 aıda Ulttyq qordyń valıýtalyq aktıvteri 3,3 mlrd dollarǵa satyldy. Munaı baǵasynyń edáýir ósýinen Ulttyq qorǵa túsimder jyl basynan beri shamamen 3,5 esege ulǵaıyp, 3,4 trln teńge boldy», - dedi Aqyljan Baımaǵambetov Úkimettiń búgingi otyrysynda.

Onyń aıtýynsha, Ulttyq qordyń ortasha jyldyq kirisi qurylǵannan bastap bıylǵy shildege deıin – 3,17%, sońǵy 5 jáne 10 jylda tıisinshe, 1,70% jáne 1,67%.

Aıta keteıik, bıylǵy shildede jyldyq ınflıatsııa 15%-ǵa deıin ósti, oǵan azyq-túlik baǵasynyń ósýi eń kóp úles qosty.

Shilde aıynda teńgeniń dollarǵa qatysty baǵamy 477,07 teńgege deıin 1,5%-ǵa álsiregen.

Sondaı-aq, bıylǵy 6 aıda halyqtyń qolma-qol aqshasyz operatsııalary 44,4 trln teńgege jetti nemese 48%-ke ósken.