Ulttyq qordyń valıýtalyq aktıvteriniń kólemi 2 mlrd dollarǵa azaıdy
«Aldyn ala derekterge sáıkes, maýsymnyń qorytyndysy boıynsha Ulttyq qordyń valıýtalyq aktıvteriniń kólemi ótken aıda 2 mlrd AQSh dollaryna tómendep, 51,9 mlrd AQSh dollaryn qurady»,- deıdi Álııa Moldabekova .
Onyń aıtýynsha, Ulttyq qor aktıvteriniń tómendeýi aktsııalar baǵasynyń aıtarlyqtaı quldyraýyna jáne AQSh dollarynyń nyǵaıýyna baılanysty boldy. Ulttyq qordyń tómendeýine Ulttyq qordan respýblıkalyq bıýdjetke transfertter bólý de áser etti.
«Sonymen qatar, maýsym aıynda transfertter kólemi 578 mlrd teńge boldy. Transfertterdiń basym bóligi Ulttyq qordyń teńgedegi shotyndaǵy qaldyqtar, sondaı-aq qorǵa teńgedegi túsimder esebinen bólindi. Sondaı-aq ishki valıýta naryǵynda 438 mln AQSh dollaryna aktıvter satyldy, bul – 199 mlrd teńgege balama soma. Ulttyq qordan satý úlesi Qazaqstan qor bırjasyndaǵy valıýtalyq saýda-sattyqtyń jalpy kóleminiń 20,7%-yn qurady»,- deıdi bank ókili.
Ulttyq bank tóraǵasynyń orynbasary ınflıatsııanyń jedeldeýimen kúreste ortalyq bankter sońǵy 20 jylda mólsherlemelerdi aýqymdy kóterýge kóshkenin atap ótti.
«Joǵary geosaıası táýekelder men federaldy rezervtik júıeniń (FRJ) ınflıatsııany tómendetý úshin barynsha agressıvti áreket etýge daıyn ekendigin málimdeýi aıasynda ótken aıdyń qorytyndysy boıynsha aktsııalar naryǵynyń aıtarlyqtaı tómendeýi baıqalady. Bul rette Ulttyq qordyń uzaq merzimdi kiristiligi qurylǵannan bastap jyldyq mánde 3,05% boldy»,- dep túsindirdi Ulttyq bank tóraǵasynyń orynbasary Álııa Moldabekova.
