Ulttyq qordyń valıýtalyq aktıvteri 58,5 mlrd dollarǵa jetti
«Jedel derekter boıynsha mamyrdyń sońynda Ulttyq qordyń valıýtalyq aktıvteri bir aıda 800 mln AQSh dollaryna ulǵaıyp, 58,5 mlrd AQSh dollaryn qurady. Ótken aıda Ulttyq qordyń valıýtalyq aktıvteriniń ósýi valıýtalyq túsimderdiń ulǵaıýyna jáne oń ınvestıtsııalyq kiriske baılanysty boldy. Mamyrda valıýtalyq túsimder 720 mln AQSh dollaryn qurady. Qorǵa túsetin túsimderdiń eleýli deńgeıi bıyl munaı baǵasynyń qalpyna kelýine jáne mamyrdaǵy úlken salyq tólemderiniń kezeńine baılanysty qalyptasty», - dep túsindirdi Ulttyq bank tóraǵasynyń orynbasary.
Sondaı-aq, ol ótken aıda aktsııalar naryǵynda da oń úrdis jalǵasyn tapqanyn atady.
«Oblıgatsııalar men altyn baǵasynyń qalpyna kelýine baılanysty Ulttyq qordyń ınvestıtsııalyq kirisi mamyrda shamamen 660 mln AQSh dollaryn nemese 1,15%-dy qurady. Sonymen qatar, mamyrda 251 mlrd teńge kóleminde kepildik berilgen jáne nysanaly transfertterdi bólý úshin Ulttyq Bank qordyń valıýtalyq aktıvterin 553 mln AQSh dollary somasyna (balamasy 237 mlrd teńge) satty. Bul rette transfertterdiń bir bóligi teńgedegi shottaǵy qaldyqtar men teńgedegi túsimder esebinen qanaǵattandyryldy», - dedi Álııa Moldabekova.
