Ulttyq qordyń transfertteri azaıady

QR Ulttyq ekonomıka mınıstri Tımýr Súleımenovtiń aıtýynsha, atalǵan qujattar Ulttyq qordan respýblıkalyq bıýdjetke beriletin transfertterdiń naqty kólemi kórsetilgen. Atap aıtqanda, 2019 jyly - 2 trln 450 mlrd teńge, 2020 jyly - 2 trln 300 mlrd teńge, al 2021 jyly transfertterdiń kólemi 2 trln teńge dep belgilenip otyr. "2019-2021 jyldarǵa arnalǵan transfertterdiń mólsheri Ulttyq qordaǵy qarajattyń tıisti jyldyń sońyna deıin jalpy ishki ónimniń boljamdy máninen 30 protsent mólsherinde tómendemeıtin qaldyq shartyn oryndaýǵa múmkindik berip otyr", - deıdi T.Súleımenov.

Aıta keteıik, búgin mınıstr Súleımenov depýtattarǵa 2019-2023 jyldarǵa arnalǵan ekonomıkalyq damý boljamyn da tanystyrdy. "2019 jyly munaı baǵasynyń bir barreli 66,7 AQSh dollaryn quraıdy degen boljam bar. Osyny eskere otyryp, bazalyq stsenarııde munaıdyń baǵasy 60 AQSh dollary deńgeıinde alyndy. 2019 jyly jalpy ishki ónim 3,9 protsent deńgeıinde, al 2023 jyly 4,6 protsentke deıin ósedi. Atalǵan kezeńde jalpy ishki ónimniń ortasha jyldyq ósý qarqyny 4,2 protsent bolady degen boljam bar", - deıdi T.Súleımenov.

Onyń aıtýynsha, kelesi jyly nomınaldy jalpy ishki ónim 64,1 trln bolsa, 2023 jylǵa deıin atalǵan kórsetkish 86,9 trln teńgege deıin ósedi. Osylaısha, jan basyna shaqqanda jalpy ishki ónim 9,9 myń AQSh dollarynan 12,9 myń dollarǵa deıin ulǵaıady.

"Orta merzimdi perspektıvada ónim óńdeý, agroónerkásip, qurylys, kólik-logıstıka jáne qyzmet salasy ekonomıkalyq ósimniń negizgi qozǵaýshy kúshi bolady. Munaı óndirý kólemi 99 mln tonnaǵa deıin ósedi. Eksport kólemi 56,5 mlrd AQSh dollarynan 68,5 mlrd dollarǵa deıin artady. Al ımport 41,9 mlrd AQSh dollaryna deıin ulǵaıady. Ulttyq bank ınflıatsııanyń jyldyq kórsetkishin 2019 jyly 4-6 protsent deńgeıinde saqtaıdy. 2020-2023 jyly ol 3-4 protsentke deıin tómendeıdi", - dep atap kórsetti T.Súleımenov.