Ulttyq qordyń ınvestıtsııalyq kirisi sáýirde 1,5 mlrd dollardy qurady

Ulttyq bank ókili OPEK + elderi sáýirdiń basynda kelisimge qol jetkizgennen keıin, teńgeniń oń dınamıkasy baıqalǵanyn atap ótti.

«Sáýirde ulttyq valıýtamyz 5,2% -ǵa 447,67-den 424,57-ge nyǵaıdy. Teńgeniń qymbattaýy shetel valıýtasyna degen suranysty tómendetti. Sáýirdiń ekinshi jartysyndaǵy munaı naryǵynyń turaqsyzdyǵyna qaramastan, munaı saqtaý oryndarynyń jetispeýshiligine jáne naryqtyń arzan munaımen tolyp ketýine baılanysty valıýta baǵamy ortasha eseppen 430 deńgeıinde boldy»,– deıdi Álııa Moldabekova.

Kóptegen kásiporyn shekteýli rejımde jumys istedi, bul shetel valıýtasyna degen suranystyń tómendeýine, ıaǵnı bırjadaǵy saýda-sattyqtyń kólemine áser etti.

«Memleket basshysynyń tapsyrmasymen Ulttyq bank Úkimetpen birlesip kvazımemlekettik kompanııalardyń valıýta naryǵyna qatysýyn úılestiredi. Osy tapsyrmany oryndaý aıasynda ishki naryqty turaqtandyrýǵa kómektesý úshin kvazımemlekettik kompanııalar ózderiniń valıýtalyq túsimderiniń bir bóligin mindetti túrde satýdy jalǵastyrdy. Sáýir aıyndaǵy túsim 230 mıllıon dollardan asty», - dedi ol.

Onyń aıtýynsha, aldyn ala málimetter boıynsha Ulttyq banktiń rezervteri sáýirde 720 mıllıon dollarǵa artyp, 30,5 mıllıard dollarǵa jetti.

Qorlardyń ulǵaıýy negizinen altyn baǵasynyń ýntsııdiń 1 605-ten 1 717 dollarǵa deıin ósýine baılanysty bolyp, altyn qory 1,1 mlrd dollardan 20,8 mlrd dollarǵa deıin ósti. Ulttyq bank 250 mln AQSh dollary mólsherindegi tazartylǵan altyndy Ulttyq qorǵa satty.

« Ulttyq banktiń rezervterindegi jáne Ulttyq qordyń aktıvterindegi altyn portfolıosy, ásirese osy jyldyń naýryz aıynyń ekinshi jartysynan bastap, syrtqy naryqtardaǵy joǵary qubylmalylyq kezeńinde qaýipsizdikti qamtamasyz etedi», – deıdi Álııa Moldabekova.

Naýryz aıynda baıqaǵan naryqtardaǵy quldyraý qor bırjasynda kompanııalardyń aktıvteriniń tómendeýine soqtyrdy.

«Alaıda sáýir aıynda qor naryǵynyń jartylaı qalpyna kelýine, sondaı-aq altyn portfeli men oblıgatsııalyq portfeldiń oń kirisine baılanysty Ulttyq qordyń ınvestıtsııalyq kirisi 1,5 mlrd dollardy qurady», – Ulttyq bank ókili.

Sonymen birge respýblıkalyq bıýdjettiń qajettilikterin qanaǵattandyrý úshin sáýirde Ulttyq qordan 706 mlrd teńge somasynda transfertter bólindi. Valıýta naryǵyndaǵy transfertterdi aıqyndaý úshin 817,5 mln AQSh dollary somasyndaǵy shetel valıýtasyndaǵy aktıvter satyldy, bul 355 mlrd teńge.

Transferttiń edáýir kólemdi bólgenine qaramastan, Ulttyq qordyń valıýta aktıvteri aldyn ala málimetter boıynsha sáýirde 1,11 mlrd dollarǵa artyp, 58,6 mlrd-ty qurady. Bul ósý joǵaryda atalǵan ınvestıtsııalyq kiristermen jáne Ulttyq qordaǵy valıýtalyq túsimmen baılanysty boldy

«Biz burynǵydaı álemdik qarjy naryqtaryndaǵy úrdisterdi qadaǵalap, taldaımyz. Inflıatsııalyq targetteý boıynsha negizgi mandat aıasynda, sondaı-aq qarjylyq turaqtylyqty qamtamasyz etý mindetteri aıasynda Ulttyq bank valıýtalyq ınterventsııalardy júrgizýge quqyly, sondaı-aq jaǵdaıdy turaqtandyrýǵa baǵyttalǵan basqa sharalardy qoldanýǵa daıyn»,– dep qorytyndylady Álııa Moldabekova.