Ulttyq qordyń aktıvteri bir aıda 2,5 mlrd dollarǵa tómendedi
«Aldyn ala derekter boıynsha, Ulttyq banktiń altyn-valıýta rezervteri osy jylǵy naýryzda 30 mlrd AQSh dollaryna deıin 0,3 paıyzǵa nemese 79 mln AQSh dollaryna ulǵaıdy. Ulttyq banktegi ekinshi deńgeıli bankterdiń shottaryna 1,5 mlrd AQSh dollary mólsherindegi shetel valıýtasynyń túsimi valıýta naryǵynda ınterventsııalarmen teńestirildi», - dedi UB tóraǵasy.
Onyń dereginshe, Ulttyq qordyń aktıvteri naýryz aıynda aktsııalar naryǵynyń 13 paıyzǵa quldyraýy jáne kepildik berilgen transferttiń bólinýi esebinen bir aıda 2,5 mlrd AQSh dollaryna nemese 4,2 paıyzǵa tómendep, 57,5 mlrd AQSh dollaryn qurady. Bul rette aktsııalar naryǵy jyldyń basynan beri shamamen 32 paıyz joǵaltyp, 23 naýryzda eń tómengi mánge jetti.
«Osyǵan baılanysty halyqaralyq jalpy rezervter osy jylǵy naýryzdyń sońynda 87,4 mlrd AQSh dollary boldy. Úkimetter men ortalyq bankter tarapynan búkil álem boıynsha qosymsha ótimdilikti bólý jónindegi ekonomıkany qoldaýdyń aýqymdy sharalaryna baılanysty aktsııalar naryǵy qalpyna kele bastady. Máselen, bıyl sáýirdiń basynan beri Ulttyq qor aktsııalary ındeksiniń kiristiligi +6,5% boldy. Jalpy alǵanda, Ulttyq qordyń ınvestıtsııalyq kiristiligi osy jylǵy sáýirdiń alǵashqy 10 kúni 850 mln AQSh dollarynan asty. Sonyń nátıjesinde Ulttyq qordyń valıýtalyq aktıvteriniń kólemi aǵymdaǵy sátte 58,2 mlrd AQSh dollaryn quraıdy», - dedi Erbolat Dosaev.