Ulttyq qordyń aktıvteri 26 trln 320 mlrd teńgege jetti
NUR-SULTAN. QazAqparat - Ulttyq qordyń aktıvteri 26 trln 320 mlrd teńgeni qurady. Bul týraly búgin Úkimet otyrysynda 10 aıdaǵy memlekettik bıýdjettiń atqarylýy jaıynda baıandaǵan QR Premer-Mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.
«Bıylǵy 10 aı ishindegi kiristerdiń ósý qarqyny 2018 jyldyń osyndaı kezeńimen salystyrǵanda joǵary. Memlekettik bıýdjettiń kiristeri - 14 paıyzǵa, respýblıkalyq - 17 jáne jergilikti bıýdjetter - 7 paıyzǵa ósti. Shyǵystardyń atqarylýy da jaqsardy: memlekettik bıýdjet shyǵystary – 98,7, respýblıkalyq bıýdjet shyǵystary – 99,2 jáne jergilikti bıýdjetterdiń shyǵystary – 98,4. Bıýdjet tapshylyǵy is júzinde esepti kezeń josparynan edáýir tómen qalyptasty: memlekettik bıýdjet boıynsha - 995 mlrd teńge, respýblıkalyq bıýdjet boıynsha – 1 trln 127 mlrd teńge. Jergilikti bıýdjetter boıynsha 20 mlrd teńge somasynda profıtsıt qalyptasty. Ulttyq qordyń aktıvteri 26 trln 320 mlrd teńgeni qurady», - dedi ol.
Onyń dereginshe, respýblıkalyq bıýdjetke túsetin kirister 5 trln 285 mlrd teńge somasynda nemese esepti kezeńge arnalǵan josparǵa 100 paıyz jınaldy. 2018 jyldyń 10 aıymen salystyrǵanda 771 mlrd teńgege ósti. Negizgi ósim: qosylǵan qun salyǵy – 443 mlrd teńge, korporatıvtik tabys salyǵy - 194 mlrd teńge, halyqaralyq saýdaǵa jáne syrtqy operatsııalarǵa salynatyn salyqtar boıynsha – 105 mlrd teńge.
«Jergilikti bıýdjetterdiń menshikti kiristeri 74 mlrd teńgege asyra oryndaldy jáne 2 trln 27 mlrd teńgeni qurady. Ótken jyldyń osyndaı kezeńimen salystyrǵanda kirister 140 mlrd teńgege ósti. Bul negizinen salyqtar esebinen qamtamasyz etildi. Kirister jospary Mańǵystaý oblysyn jáne Nur-sultan qalasyn qospaǵanda, barlyq óńirlerde asyra oryndaldy», - dedi Á.Smaıylov.
