Ulttyq qordyń aktıvteri 2015 jylǵa 72,5 mlrd. AQSh dollaryna deıin ósýi qajet - Q.Kelimbetov
TANA. 20 qyrkúıek. QazAqparat - Ulttyq qordyń aktıvteri 2015 jylǵa 72,5 mlrd. AQSh dollaryna deıin ósýi qajet. Búgin «Nur Otan» HDP parlamenttik fraktsııasynyń otyrysynda sóılegen sózinde QR Ekonomıkalyq damý jáne saýda mınıstri Qaırat Kelimbetov osylaı aıtty.
Onyń atap ótýinshe, bıýdjet saıasaty munaıdan túsken túsimderdi «jep qoıýǵa» jol bermeý maqsatynda bıýdjet pen Ulttyq qordyń teńgerimdiligin qamtamasyz etýge quryldy. Álemdik ekonomıkadaǵy jaǵdaıdyń áleýetti ýshyǵyp ketýin esepke ala otyryp, orta merzimdi perspektıvada Ulttyq qor qarajattaryn qalyptastyrý men paıdalaný jónindegi Tujyrymdamaǵa sáıkes 8 mlrd. AQSh dollary kóleminde kepildengen trasfertti shekteý arqyly Ulttyq qorda qarjy qarajattaryn jınaqtaý saıasaty jalǵasatyn bolady.
«Ulttyq qordyń aktıvteri 2015 jylǵa 72,5 mlrd. AQSh dollaryna deıin ósýi qajet. Bul JІÓ-niń 30,4 paıyzdan kem emes bóligin quraıdy. Osyǵan baılanysty 2012-2014 jyldary Ulttyq qordan bólinetin transfert 1 200,0 mlrd. teńge kóleminde josparlanǵan», - dedi ol.
Q.Kelimbetovtiń sózine qaraǵanda, Ulttyq qordan bólinetin kepildengen transfertti shekteý Qorda munaıdan túsken tabystardyń taza jınaqtalýyna múmkindik beredi.
«Memlekettik bıýdjet túsimderiniń jalpy kóleminde kepildendirilgen transfertti shekteý munaı qarajatynyń taza jınaqtalýyna jáne Ulttyq qordan tartylatyn qarajattar úlesiniń 2012 jylǵy 21,8 paıyzdan 2014 jyly 18,7 paıyzǵa deıin tómendeýine áser etedi», - dedi mınıstr.
