Ulttyq qordan kepildendirilgen transferttiń jyl saıynǵy mólsheri 2012-2013 jyldarǵa 1 trln. 380 mlrd. teńgeni quraıdy
ASTANA. 29 aqpan. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń Ulttyq qorynan 2012-2014 jyldarǵa arnalǵan kepildendirilgen transfert týraly» zańyna ózgeris engizý
týraly» zań jobasyn maquldady.
Atalǵan qujat bıýdjet kodeksiniń 24-baby, 2-tarmaǵyna, sondaı-aq QR Prezıdentiniń aǵymdaǵy jylǵy Joldaýynda aıtylǵan tapsyrmalaryna sáıkes ázirlengen.
Osyǵan oraı zań jobasymen Ulttyq qordan 2012-2014 jyldarǵa arnalǵan respýblıkalyq bıýdjetke beriletin kepildendirilgen transferttiń mólsheri naqtylanady. Bul rette atalǵan mólsher absolıýtti mánde 8 mlrd. dollar deńgeıinde bekitilip otyr. Toqtala ketetin jáıt, respýblıkalyq bıýdjetke berilgen kepildendirilgen transferttiń mólsheri ekonomıkadaǵy jaǵdaıǵa baılanysty (kontrtsıkldik qaǵıdat) 15 paıyzǵa deıin azaıtý nemese ulǵaıtý jaǵyna qaraı túzetilýi múmkin. Osyny eskere kele, sondaı-aq, 1 AQSh dollarynyń boljamdyq baǵamy 150 teńge ekenin eskere otyryp, kepildendirilgen transferttiń jyl saıynǵy mólsheri 2012-2013 jyldarǵa 1 trln. 380 mlrd. teńge mólsherinde aıqyndaldy.
Jalpy alǵanda zań jobasyn qabyldaý orta merzimdi kezeńge arnalǵan bıýdjettik ınvestıtsııalyq jobalardy iske asyrýǵa, sondaı-aq, respýblıkalyq bıýdjettiń basqa da shyǵystaryn qarjylandyrýǵa múmkindik beredi.
