Ulttyq qordan bala shotyna aýdarylatyn aqshanyń biryńǵaı operatory belgilendi

ASTANA. QazAqparat – Biryńǵaı jınaqtyq zeınetaqy qory Ulttyq qordan bala shotyna aýdarylatyn aqshanyń biryńǵaı operatory bolyp belgilendi. Bul týraly Úkimet otyrysynda Ulttyq ekonomıka mınıstriniń birinshi orynbasary Tımýr Jaqsylyqova málim etti, dep habarlaıdy QazAqparat tilshisi.

«Ulttyq qor – balalar úshin» bastamasyn 2024 jyldan bastap iske qosý tásilderi ázirlenýde. 18 jasqa deıingi barlyq balalarǵa jeke jınaqtaýshy shottar ashylady, olarǵa jyl saıyn qarajat túsetin bolady. Shot operatory retinde «Biryńǵaı jınaqtaýshy zeınetaqy qory» anyqtaldy.

Jınaqtalǵan qarajat kámeletke tolǵan kezde ǵana paıdalanýǵa qoljetimdi bolady.

Kelesi jyly jobany iske qosý úshin qajetti zańnamalyq ózgerister qabyldaý josparlanýda.

Aýyldyq aýmaqtardy damytýdyń 2023-2027 jyldarǵa arnalǵan tujyrymdamasyn ázirleý boıynsha jumys júrgizilýde. Ony 2023 jylǵy naýryzdyń sońyna deıin qabyldaý josparlanyp otyr.

Tujyrymdamanyń negizgi maqsaty – aýyl halqynyń ómir súrý sapasyn arttyrý jáne olar úshin jaıly ómir súrý ortasyn qurý. Bul úshin ınstıtýtsıonaldyq qamtamasyz etýdi damytý arqyly aýyldyq saıasat tásilderiniń tıimdiligi arttyrylady.

Qazirgi ýaqytta Tujyrymdamanyń jumys jobasy jergilikti atqarýshy organdarmen talqylanýda», - dedi birinshi vıtse-mınıstr.

Onyń aıtýnysha, Kásipkerlik kodekske ınvestıtsııalar týraly kelisim jasasý protsesin jeńildetý úshin túzetýler ázirlendi.

«Tıisti Zań jobasy Parlament Senatynyń qaraýynda. Atap aıtqanda, basym qyzmet túrleriniń tizbesinen tyıym salynǵan tizimge kóshý arqyly ınvestıtsııalar týraly kelisimderdiń qoldaný aıasy keńeıtiledi.

Investorlardyń shyǵyndaryn azaıtý jáne ınvestıtsııalyq sheshimder qabyldaýdy jedeldetý úshin «ready-built factory» tıpi boıynsha daıyn óndiristik alańdardy usyný baǵytynda jumys júrgizilýde», - dedi Tımýr Jaqsylyqov.