Ulttyq qordan ár balaǵa aýdarylǵan qarajatqa salyq salynbaıdy

ASTANA. QazAqparat – «Ulttyq qor – balalarǵa» jobasy aıasynda jyl saıyn qańtarda jetkinshekterdiń shotyna qarajat aýdarylady. Bul týraly Qarjy vıtse-mınıstri Dáýren Temirbekov aıtty, dep habarlaıdy QazAqparat tilshisi.

«Bala ómirge kelgen kezde shottar Ádilet mınıstrliginiń jeke tulǵalar derekqorynyń aqparaty negizinde avtomatty túrde ashylady. Jyl saıyn 1 qańtarda bala 18 jasqa tolǵanǵa deıin shottarǵa qarajatty shartty túrde esepteý júrgiziletin bolady. Qarajatty maqsatty paıdalaný úshin Biryńǵaı jınaqtaýshy zeınetaqy qory ózara is-qımyl jasaıtyn ýákiletti operatorlar anyqtalady. Bul turǵyda «Otbasy bank» AQ, «Qarjy ortalyǵy» AQ, ekinshi deńgeıdegi bankter qamtylady», - dedi D. Temirbekov Senat depýtattarymen kezdesý kezinde.

Onyń aıtýynsha, shotta jınaqtalǵan qarajatty 18 jasqa tolǵandar ǵana paıdalana alady.

«Jobaǵa Qazaqstan Respýblıkasynyń azamaty sanalatyn balalar qatysady. Sondaı-aq, bul shot qarajatyn salyq salýdan bosatý usynyldy», - dedi vıtse-mınıstr.

Budan buryn habarlanǵandaı, Dáýren Temirbekov «Ulttyq qor – balalarǵa» jobasy aıasynda aýdarylatyn qarajat týraly aıtty.