Ulttyq qordan alynǵan qarajat bolashaq urpaǵymyzdyń nesibesin jep qoıýmen para-par – depýtat

NUR-SULTAN. QazAqparat -Parlament Májilisiniń jalpy otyrysynda depýtat Azat Sembınov Premer-Mınıstrdiń orynbasary Álıhan Smaılovqa depýtattyq saýal joldap, onda ulttyq qordaǵy qarajat máselesin kóterdi, dep habarlaıdy QazAqparat.

Depýtattyń aıtýynsha, bıylǵy bıýdjetti naqtylaý kezinde, shyǵystardy óteýdiń negizgi kózderiniń biri – qaıtadan ulttyq qordyń 850 mlrd teńge somasyndaǵy qarajaty boldy.

«Jalǵasyp jatqan «koronakrızıs» jáne 10,6 % munaısyz bıýdjettiń tapshylyǵy jaǵdaıynda bul sheshimdi maquldaýǵa májúr boldyq. Sonymen qatar, Ulttyq qordan alynǵan qarajat, elimizdiń bolashaq urpaqtarynyń nesibesin jep qoıýmen para-par. «Aq jol» fraktsııasy birneshe ret Norvegııa munaı qorynyń tájirıbesine súıenýge shaqyrǵan, ıaǵnı, aǵymdaǵy bıýdjettik qarjylandyrýǵa ınvestıtsııalyq tabystyń belgili bir bóligi ǵana baǵyttalýy múmkin, al negizgi jınaqqa eshkim qol suǵa almaıdy. Mysaly, aldyńǵy daǵdarystan keıin Norvegııa ózinniń munaı qorynyń bar-joǵy 1-aq protsentin jumsaǵan. Al Qazaqstannyń ulttyq qorynan sol kezde 83 mlrd dollar jumsalǵan» dedi depýtat búgingi Májilis otyrysynda.

Onyń aıtýynsha, 2001-2015 jyldary ulttyq qorǵa 147 mlrd dollar túsim túsken. Demek Qazaqstan búgingi daǵdarysqa deıin ulttyq qordyń jartysynan astamyn jumsap qoıǵan.

«Aq jol» fraktsııasy elimizdiń bolashaq urpaqtarynyń ıgiligin ysyrap etýdi jónsiz dep sanaıdy. Ásirese, bul shyǵyndar, aıaqtalmaǵan qurylys obektileriniń baǵalarynan bastap, oqýshylarǵa bólingen noýtbýkterdi urlaýǵa deıingi jemqorlyqpen baılanysty bolsa. Osy negizde «Aq jol» fraktsııasynyń depýtattary ulttyq qordy saqtaý jáne ony jınaqtaý fýnktsııasyn iske asyrý maqsatynda, aıtylǵan kemshilikterdi eskere otyryp, Ulttyq qordy qalyptastyrý jáne paıdalaný tujyrymdamasyn qaıta qaraýdy usynady» dep atap ótti Azat Sembınov.