Ulttyq qordan alynatyn transfert 280 mlrd teńgege azaıdy - Baqytjan Saǵyntaev
ASTANA. QazAqparat - Aǵymdaǵy jyly Ulttyq qordan alynatyn kepildendirilgen transfert kólemi 280 mlrd teńgege azaıdy. Bul týraly QR Parlamenti palatalarynyń birlesken otyrysynda depýtattardyń saýalyna jaýap bergen Úkimet basshysy Baqytjan Saǵyntaev aıtty, dep habarlaıdy QazAqparat tilshisi.
«Munaılyq emes tapshylyqty odan ary tómendetý boıynsha mindet qoıyldy. Ortasha merzimdi josparda 2025 jylǵa qaraı bizdiń maqsat - ony 6 paıyzǵa deıin jetkizý. Bul kórsetkishke qol jetkizetindigimizge senimdimiz. Birinshi kezekte, aǵymdaǵy jyldan bastap-aq Ulttyq qordan kepildendirilgen transfertti tómendetýdi bastadyq. Egerde biz jyl saıyn 2 trln 880 mrld teńge alatyn bolsaq, aǵymdaǵy jyly 280 mlrd teńgege tómendettik. Kelesi jyly 300 mlrd-qa tómendetemiz. Al 2020 jyly biz Ulttyq qordan tek qana 2 trln teńge alatyn bolamyz. Al bul atalǵan kórsetkishti tómendetýge ákeledi», - dedi Baqytjan Saǵyntaev.
Onyń aıtýynsha, elimizdiń ekonomıkasyn ártaraptandyrýǵa baǵyttalǵan úlken jumystar júrgizilýi tıis. Buǵan qosa, elimizde Memleket basshysynyń bastamasymen ekonomıkalyq ósimniń jańa modeli jarııa etilip otyr.
«Osyǵan baılanysty aýqymdy jumystar júrgizilip jatyr. Qazirgi ýaqytta Fraýngofer ınstıtýtymen birlesip, búkil eldegi 500 iri jáne orta kásiporyndardy zerttep, olardyń 4.0 parametrlerine daıyndyqtaryn saralady. Búginniń ózinde 14 iri kompanııanyń óz baǵdarlamasy bar. Ekonomıkany tsıfrlandyrý boıynsha da úlken jumystar júrgizilýde», - dedi Úkimet basshysy.
Premer-Mınıstrdiń aıtýynsha, elimizdiń júıe quraýshy kompanııalary tsıfrlandyrý baǵytynda jumys istep jatyr. Olar ózderiniń básekelestigin, eńbek ónimdiligin arttyryp, eksportqa shyǵaratyn ónim úlesin arttyra túsýde.
