Ulttyq qor tabysyn balalarǵa aýdarý: Mınıstr aldyn ala tetikterdi atady

NUR-SULTAN. QazAqparat – 2024 jyldan balalardyń derbes esepshottaryna birdeı mólsherde qarjy aýdaryla bastaıdy. Bul týraly QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Prezıdenttiń «Ulttyq qor - balalarǵa» bastamasyn júzege asyrý maqsatynda Úkimet Ulttyq bankpen birlesip, baǵdarlamany iske qosý tetikterin pysyqtap jatyr. 18 jasqa deıingi barlyq balaǵa jeke jınaqtaýshy esepshot ashylatyn bolady. 2024 jyldan bastap jyl saıyn balalardyń esepshotyna Ulttyq qordyń ınvestıtsııalyq tabysynyń jartysy aýdaryla bastaıdy», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, qarajat jylyna bir ret kelesi jyldyń basynda 18-ge tolmaıtyn barlyq balaǵa teńdeı mólsherde aýdarylatyn bolady.

«Ázirshe aldyna ala tetikteri osyndaı. Qazirgi ýaqytta esepteýler qosymsha pysyqtalyp jatyr», - dedi Álibek Qýantyrov.