Ulttyq qor – balalarǵa: Jańa jyldan bastap balalardyń esepshotyna qarajat túse bastaıdy

ASTANA. QazAqparat – «Ulttyq qor – balalarǵa» jobasy aıasynda jańa jyldan bastap balalardyń esepshotyna qarajat túse bastaıdy. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalaǵan Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Osy oraıda halyqtyń turmys sapasyna tikeleı áser etken keıbir sharalardy atap ótkim keledi. Mysaly, 2020 jyldan beri muǵalimderdiń jalaqysy eki ese ósti. Dárigerlerdiń aılyǵy da aıtarlyqtaı kóbeıdi. Qazir olardyń tabysy elimizdegi ortasha jalaqydan áldeqaıda joǵary. Jurtqa zeınetaqy jınaǵynyń bir bóligin paıdalaný múmkindigi berildi. Mıllıonǵa jýyq adam osy jobanyń ıgiligin kórdi – turǵyn úı máselesin sheship, baspanaly boldy», - dedi Memleket basshysy.

Prezıdent «Jaıly mektep» jobasy aıasynda 400-ge jýyq mektep salynatyndyǵyn aıtty.

«Qazir aýyldyq jerde 300-den astam densaýlyq saqtaý nysany salynyp jatyr. «Ulttyq qor – balalarǵa» jobasy qolǵa alyndy. Sonyń arqasynda jańa jyldan bastap balalardyń esepshotyna qarajat túse bastaıdy. Igerilmeı jatqan nemese zańsyz berilgen 8 mıllıon gektar jer memleket menshigine qaıtaryldy. Men naqty iske asqan sharalardyń bir bóligin ǵana atap óttim. Shyn máninde, kóp jumys atqaryldy, bolashaqta da óz jalǵasyn tabady», - dedi Qasym-Jomart Toqaev.