«Ulttyq qor – balalarǵa»: Bir otbasy perzentteriniń qarajatyn biriktirýge bola ma

ASTANA. QazAqparat – «Ulttyq qor – balalarǵa» jobasy aıasynda bir otbasy balalarynyń bári 18 jasqa tolǵanda ǵana olardyń qarajattaryn biriktirýge bolady. Bul týraly Májilistiń jalpy otyrysynda Zańnama jáne sot-quqyqtyq reforma komıtetiniń múshesi Únzıla Shapaq aıtty, dep habarlaıdy QazAqparat tilshisi.

Keıbir zańnamalyq aktilerge Ulttyq qordan balalarǵa tólem jasaý máseleleri boıynsha ózgerister men tolyqtyrýlar engizý týraly zań jobasyn talqylaý barysynda depýtat Dáýlet Muqaev bir otbasy balalarynyń qarajatyn biriktirý múmkindigine qatysty saýal qoıǵan edi.

«Úıde aǵaıyndy balalar bolady. Úlkeni 17 jasta delik. 3 500 dollardy 18 jylǵa eseptegende, ol bir jylǵa 200 dollar ǵana alady. Bul qarajat bilim alýǵa da, úı alýǵa da jetpeıdi. Onyń artynan erip kele jatqan baýyr-qaryndastaryna aqshasyn aýdarý múmkindigi bar ma?», - dep surady Dáýlet Muqaev.

Saýalǵa jaýap bergen Májilis depýtaty Únzıla Shapaqtyń naqtylaýynsha, bala 18 jasqa tolǵannan keıin shottaǵy aqshasy 10 jyl saqtalady.

«Bir otbasynyń balalarynyń bári 1 jylda 18 jasqa tolmaıdy. Sondyqtan sońynan ergen baýyrlarynyń jasy 18-ge tolǵan sátte ǵana qarajattary biriktiriledi. Osyǵan deıin qoldanylyp kelgen zeınetaqy qorynan aqsha alý tetigimen birdeı bolady. Bul zańda kózdelgen», - dedi depýtat.