Ulttyq qor 2020 jylǵa qaraı 2 trln teńgege qysqartylady
ASTANA. QazAqparat - Qazaqstan Prezıdenti Nursultan Nazarbaev jyl saıynǵy halyqqa Joldaýynda Ulttyq qor qarajatyn paıdalanýǵa utymdylyq turǵysynan qaraýǵa nazar aýdardy.
«Ulttyq qordan alynǵan kepildendirilgen transfert kólemi 2020 jylǵa qaraı kezeń-kezeń boıynsha 2 trıllıon teńgege qysqartylýǵa tıis. Salyq saıasatyn bıznestiń «kóleńkeden» shyǵýyna beıimdep, shıkizattyq emes sektordaǵy salyqtyq bazany keńeıtýge baǵyttaý kerek», - dep atap ótti Nursultan Nazarbaev.
Joldaýda jańasha salyq rejımi jalpyǵa ortaq deklaratsııalaý engizilýge qatysty ekendigi keltirilgen.
«Qazirgi salyq jeńildikterin ońtaılandyrý qajet. Jalpyǵa ortaq deklaratsııalaý qarsańynda arnaýly salyq rejimin jańasha qarastyrý kerek. Salyqtyq ákimshilendirý tetikteri jetildirýdi talap etedi. Eń aldymen, munyń qosymsha qun salyǵyn jınaýǵa qatysy bar», - dep atap ótti Elbasy.
Sonymen qatar, Úkimetke kvazımemlekettik sektordyń syrtqy jáne ishki qaryzdaryna monıtorıng júrgizý men baqylaý jasaý júıesin qalyptastyryp, onda tártip ornatý júkteldi.
Eske sala ketsek, 31 qańtarda QR Prezıdenti Nursultan Nazarbaevtyń el halqyna arnaǵan «Qazaqstannyń úshinshi jańǵyrýy: jahandyq básekege qabilettilik» taqyrybyndaǵy Joldaýy jarııalandy .
