Ulttyq konkıshiler federatsııasynda vıtse-prezıdent laýazymy alynyp tastaldy
ALMATY. QazAqparat - Ulttyq konkıshiler federatsııasy mánerlep syrǵanaýdan Qazaqstan chempıonaty bekitilgen erejege sáıkes 2022 jyldyń jeltoqsan aıynda ótetinin resmı túrde málim etti, dep habarlaıdy QazAqparat tilshisi.
«El chempıonaty 2022 jyldyń jeltoqsan aıynda ótedi. Qatysýshylarǵa sharanyń ótetin orny men naqty kúni keıinirek aıtylady»,- dep habarlady federatsııadan.
Uıym málimetinshe, federatsııanyń vıtse-prezıdenti Oksana Ten 21-23 aqpan aralyǵynda Almatyda mánerlep syrǵanaýdan Qazaqstan chempıonaty ótetini týraly óńirlerge jiberiletin jedelhatqa qol qoıǵan. Bul qujat búgingi kúni jaramsyz dep tanyldy.
«Federatsııa vıtse-prezıdentteriniń mórge qol qoıýǵa jáne paıdalanýǵa, sondaı-aq jeke sheshim qabyldaýǵa quqyǵy joq. Respýblıkalyq jarystardy ótkizý týraly ereje sportshylardyń múddeleri men jattyqtyrýshylar quramynyń pikirin eskere otyryp, alqa jıynynda qaralady. Federatsııamen kelisilip, Mádenıet jáne sport mınıstrligine bekitýge jiberiledi»,- dep atap ótti Ulttyq konkıshiler federatsııasy.
Eske salaıyq, 11 aqpanda uıymnyń quryltaı jınalysynyń qorytyndysy boıynsha vıtse-prezıdentter laýazymy joıyldy.
«Federatsııa reformalar men ózgeristerdiń ýaqyty kelgenine senimdi. Mánerlep syrǵanaý ár adam úshin naqty jaýapkershilik aımaqtary bar naqty sheshim qabyldaý júıesin qajet etedi. Komandada jumys isteı alatyn, sportshylardyń daıyndyǵy men ósýin naqty qalyptastyratyn, qarjylandyrýdyń ashyq júıesi men ádil tórelik etetin tıimdi menedjerlerdiń ýaqyty keldi. Sonymen qatar, federatsııa O.A.Ten atqarǵan jumysy men mánerlep syrǵanaý sportynyń damýyna qosqan úlesi úshin alǵys aıtady», - delingen UKF habarlamasynda.
Buǵan deıin Ulttyq konkıshiler federatsııasynyń vıtse-prezıdenti Oksana Ten qyzmetin bosatý týraly ústinen jazylǵan aryzǵa baılanysty baspasóz máslıhatyn ótkizgen bolatyn.
