Ulttyq kompanııalarǵa kásibı bilikti mamandar tartý tetigi iske qosyldy

ASTANA. QazAqparat - Elimizdiń ulttyq holdıngteri men ulttyq kompanııalary iri nysandar boıynsha mámilelerge qoldaý kórsetý úshin táýelsiz konsýltanttardy irikteýge kiristi. Bul týraly «Atameken» Ulttyq kásipkerler palatasynyń baspasóz qyzmetinen habarlandy.

«Samuryq-Qazyna» Ulttyq ál-aýqat qorynyń erejesine sáıkes, táýelsiz konsýltantty jáne baǵalaý qyzmetin usynýshyny tańdaý tártibi aıqyndalǵan bolatyn. Osyǵan oraı, qazirgi kúni áleýetti qatysýshylardan baǵaǵa qatysty usynystar men suranymdar qabyldaý protsesi júrgizilýde.

Erejelerge sáıkes, táýelsiz konsýltanttardy anyqtaý jónindegi konkýrsqa otandyq qarjy naryǵynyń ókilderi de qatysa alady. Oǵan qatysý úshin ulttyq kompanııanyń nysandaryn básekelestik ortaǵa satý boıynsha baǵaǵa qatysty usynystar jasap, sonymen qatar, kompanııanyń qyzmetine shaǵyn sholýlar usyný qajet. Kommertsııalyq usynystar tikeleı ulttyq kompanııalarǵa joldanady.

«Qazirgi tańda Ekonomıkany jańǵyrtý jónindegi memlekettik komıssııa sheshimimen Qarjy mınıstrligi Memlekettik kiris jáne jekeshelendirý komıtetiniń janynan, «Samuryq-Qazyna» UÁQ», «Báıterek» UBH, «QazAgro» holdıngi janynan Jobalyq keńseler ashylyp, onyń jumysyna halyqaralyq konsýltanttar, halyqaralyq qarjy ınstıtýttarynyń sarapshylary, Qazaqstan Qor bırjasynyń ókilderi tartylǵan. Ondaǵy jumys toptaryn qurýdaǵy maqsat - jekeshelendiriletin nysandar týraly onyń sharttaryn, paket aktsııalarynyń mólsherin, satý merzimderin qamtyǵan usynymdar ázirleý» - delingen baspasóz baıanynda.