Ulttyq komıssııa úmitti aqtaıdy
ASTANA. QazAqparat - Memleket basshysy Nursultan Nazarbaev jýyrda Prezıdent janyndaǵy qoǵamdyq sanany jańǵyrtý baǵdarlamasyn júzege asyratyn ulttyq komıssııany qurý týraly Jarlyqqa qol qoıdy.
«Qoǵamdyq sanany jańǵyrtý baǵdarlamasyn iske asyrý, eldiń odan ári qaryshty mádenı-gýmanıtarlyq damýyn qamtamasyz etý maqsatynda jáne Qazaqstan Respýblıkasy Konstıtýtsııasynyń 44-babynyń 20) tarmaqshasyna sáıkes qaýly etemin: 1. Osy Jarlyqqa qosymshaǵa sáıkes quramda Qazaqstan Respýblıkasy Prezıdentiniń janynan Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııa qurylsyn. 2. Osy Jarlyq qol qoıylǵan kúninen bastap qoldanysqa engiziledi»,- delingen Aqordanyń resmı saıtynda jarııalanǵan qujatta.
Prezıdent janyndaǵy qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń tóraǵasy bolyp QR Prezıdenti Ákimshiliginiń basshysy Ádilbek Jaqsybekov bekitildi. QR Prezıdenti Ákimshiligi basshysynyń birinshi orynbasary Marat Tájın men QR Premer-Mınıstri Keńsesiniń basshysy Nurlan Aldabergenov tóraǵanyń orynbasarlary, Іshki saıasat bóliminiń meńgerýshisi Aıda Balaeva hatshysy bolyp saılandy.
Komıssııa músheleriniń qatarynda Aqparat jáne kommýnıkatsııalar mınıstri Dáýren Abaev, Syrtqy ister mınıstri Qaırat Ábdirahmanov, Qarjy mınıstri Baqyt Sultanov, Mádenıet jáne sport mınıstri Arystanbek Muhamedıuly, Din isteri jáne azamattyq qoǵam mınıstri Nurlan Ermekbaev, Ádilet mınıstri Marat Beketaev, Bilim jáne ǵylym mınıstir Erlan Saǵadıev, QR Parlamenti Májilisi tóraǵasynyń orynbasary Vladımır Bojko, Qazaqstan halqy Assambleıasy hatshylyǵynyń meńgerýshisi Darhan Myńbaı, sondaı-aq Astana men Almaty qalalarynyń jáne oblystardyń ákimderi, Parlament depýtattary, saıası partııalardyń jetekshileri, zııaly qaýym ókilderi, BAQ basshylary, qoǵamdyq uıymdardyń ókilderi bar.
Buǵan deıin memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasy jarııalanyp, Qazaqstan basshysy qoǵamdyq sanany qalaı ózgertý qajettigi týraly óziniń oramdy oılarymen bólisken bolatyn. Elimizdegi jáne shetelderdegi sarapshylar, zııaly qaýym ókilderi Elbasynyń maqalasyna qatysty ashyq pikir bildirdi. Memleket jáne qoǵam qaıratkeri Myrzataı Joldasbekovtiń aıtýynsha, Elbasynyń bul maqalasy qazaqtyń jarqyn bolashaǵyn aıqyndap bergen qujat. «Elbasynyń «Bolashaqqa baǵdar: rýhanı jańǵyrý» atty maqalasy - úlken strategııalyq máni bar, qazaqtyń jarqyn bolashaǵyn aıqyndap bergen qujat. Bul maqalasynda Elbasy qazaq halqy ári qaraı qalaı damıdy, qoǵam qalaı ilgerileý kerek degen máselelerdi tujyrymdamasyn jasady. Sonyń ishinde eń kúrdeli máseleniń biri - latyn qarpine kóshýdi Elbasy buryn da aıtqan. Bul búkil qazaq zııalylaryn qýantqan jańalyq boldy»,- dedi Myrzataı Joldasbekov Mádenıet jáne sport mınıstrliginiń keńeıtilgen alqa májilisinde sóılegen sózinde. Onyń pikirinshe, bizdiń qazir latyn qarpine kóshýge tolyq múmkindigimiz bar. «Órkenıetttiń kóshinen qalmaýymyz kerek. Buryn latynǵa qalaı kóshemiz dep ýaıymdaıtyn edik. Qazir ondaı ýaıym joq. Balabaqshadan bastap mektep oqýshylaryna deıin bári latynsha biledi, olar aǵylshyn tilin óz erikterimen úırenip jatyr. Demek latyn qarpine kóshetin kezimiz keldi»,- dedi ol.
