Ulttyq komıssııa otyrysynda balalar sýıtsıdynyń aldyn alý máseleleri talqylandy
ASTANA. 24 maýsym. QazAqparat /Qanat Mámetqazyuly/ - Búgin Astanada Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy bolyp ótti.
Onda Bilim jáne ǵylym mınıstrliginiń oqýshylar arasyndaǵy sýıtsıdtiń aldyn alý jónindegi atqarylǵan sharalary talqylandy. Budan bólek, Batys Qazaqstan jáne Qaraǵandy oblystarynda mamandandyrylǵan otbasy men balalardy áleýmettik qamsyzdandyrý ınstıtýttaryn, otbasylaryna daǵdarystan shyǵý jónindegi mamandandyrylǵan psıhologııalyq-pedagogıkalyq kómek qyzmetterin damytý týraly másele qaraldy.
Mamandardyń aıtýynsha, sýıtsıdtyq aýytqýshylyq mektep oqýshylary arasynda negizinen 9 jastan keıin baıqalady. Bul eleýli psıhıkalyq aýrý men reaktıvti kúızeliske sırek baılanysty. Sarapshylardyń málimetteri boıynsha kámeletke tolmaǵandardyń ózine-ózi qol jumsaýynyń 80 paıyzy otbasylyq janjaldardan, ómirde kezdesetin túrli sátsizdikterden, eresekter tarapynan zorlyq-zombylyqtan qorqý, jekelegen pedagogtardyń jónsiz minez-qulqyna, aınalasyndaǵylardyń meıirimsizdiginen týyndap jatady.
Osy másele boıynsha memlekettik organdardy úılestirý maqsatynda Bilim jáne ǵylym mınıstrligi Іshki ister, Densaýlyq saqtaý, Baılanys jáne aqparat, Mádenıet, Týrızm jáne sport mınıstrlikterimen birlesip kámeletke tolmaǵandar arasyndaǵy sýıtsıdaldyq minez-qulyqtyń profılaktıkasy jónindegi is-sharalar josparyn ázirlegen bolatyn. Bul rette mınıstrliktiń málimetterine qaraǵanda, mektep psıhologtaryna, áleýmettik qyzmetkerler men pedagogtarǵa arnalǵan psıhologııalyq trenıngter ótkizý jónindegi usynymdar daıyndalǵan. Keltirilgen málimetterge qaraǵanda, búgingi kúni mekteptik bilim berý júıesinde 290 myńdaı pedagog kadr jumys isteıdi. Onyń 123 myńy synyp jetekshileri bolyp tabylady. Mektepterdegi tárbıe jumysyn 8 myńdaı dırektorlardyń orynbasarlary, 3 myńnan astam áleýmettik pedagog, 1,5 myńnan artyq polıtsııanyń mektep ınspektorlary úılestiredi. Mektep pedagogtarynyń sany 8 myńdaı adamdy quraıdy. Alaıda bul az. Psıhologtarǵa degen qajettilik qazirgi kezde 1 myńnan astam adamdy quraıdy.
Sonymen qatar, Ulttyq komıssııa otyrysynda psıhologtardyń barlyǵy birdeı kámeletke tolmaǵandardyń sýıtsıdtyq minez-qulyqtarynyń aldyn alýǵa jetkilikti daıyndalmaǵanyn atap ótti. Máselen, 7990 psıhologtyń tek 66 paıyzynda bazalyq psıholog bilimi bolsa, 43 paıyzynyń jumys ótili úsh jyldan az.
