Ulttyq komıssııa «25 ıgi is» aıasynda 400-den astam qaıyrymdylyq sharasyn uıymdastyrady

ASTANA. QazAqparat - QR Prezıdenti janyndaǵy Áıelder isi jáne otbasy-demografııalyq saıasat jónindegi ulttyq komıssııa «25 ıgi is» atty aktsııanyń bastalǵanyn málimdedi. Táýelsizdiktiń 25 jyldyǵyna arnalǵan aktsııa aıasynda 400-den astam qaıyrymdylyq sharasy qamtylmaq. Bul týraly búgin Ortalyq kommýnıkatsııalar qyzmetinde ótken brıfıngte Qazaqstannyń isker áıelder qaýymdastyǵynyń prezıdenti Raýshan Sársembaeva málim etti.

«Búginnen bastap QR Prezıdenti janyndaǵy Áıelder isi otbasy-demografııalyq saıasat jónindegi ulttyq komıssııa Táýelsizdiktiń 25 jyldyǵyna arnalǵan «25 ıgi is» aktsııasynyń bastalǵanyn jarııalaıdy. Aıtýly aktsııa azamattyq sektordy nemese memlekettik qurylymdardy ǵana qamtyp qoımaı, aýqymyn keńeıtý úshin biz buǵan barsha jurtshylyqty tartatyn bolamyz. «25 ıgi is» elimizdiń barlyq óńirlerin qamtyp, onyń aıasynda 400-den astam qaıyrymdyq sharasy ótedi. Árıne, basym bóligi áıelderdiń kúshimen ótpek», - dedi R. Sársembaeva.

Onyń aıtýynsha, aktsııanyń negizgi ózegi qaıyrymdylyq sharalaryna negizdeledi. Máselen, respýblıkalyq deńgeıde ótetin aktsııanyń biri az qamtylǵan otbasylardaǵy klassıkalyq ota jasaýdy qajet etetin balalarǵa kómektesý. «Ekinshiden, biz áke ınstıtýtyn kóterýge nazar aýdaramyz. Bul da ulttyq komıssııanyń otbasy-demografııalyq saıasatynyń bir baǵyty. Osyǵan oraı, otbasy tárbıesindegi ákelerdiń rólin kóterý úshin ákelerdiń respýblıkalyq sletyn ótkizý josparlanady», - dedi ol.