Ulttyq qoǵamdyq senim keńesi jańǵyrýdyń tyń ózegine de aınalady - Máýlen Áshimbaev
«9 maýsymda ótken prezıdenttik saılaýda qazaqstandyqtardyń basym bóligi óz daýystaryn Qasym-Jomart Toqaevqa berip, Elbasymyzdyń strategııalyq saıasatynyń sabaqtastyǵy men elimizdiń turaqty damýyn tańdady. 12 maýsymda Qasym-Jomart Kemeluly Qazaqstan halqyna ant berip, resmı túrde qyzmetine kiristi. Sonyń nátıjesinde, Qazaqstanda joǵary bıliktiń aýysýy elimizdiń barlyq zańyna sáıkes júrgizildi, bul Qazaqstannyń ishki turaqtylyǵyn qamtamasyz etetin negizgi faktor dep qabyldaımyz. Keshe Memleket basshysy ulyqtaý rásiminde bılik pen qoǵamnyń aldynda turǵan eń negizgi maqsattarǵa toqtalyp ótti. Olardyń júzege asyrylýy halyqtyń ál-aýqatyn ári qaraı arttyryp, ekonomıkalyq jáne saıası júıemizdiń damýyna tyń serpin beretini sózsiz. Sonymen qatar, Qasym-Jomart Toqaev bılik pen azamattyq qoǵamnyń arasyndaǵy dıalogty ári qaraı damytý kerektigine de erekshe nazar aýdardy», - dedi M. Áshimbaev.
Bul turǵyda «Nur Otan» partııasy Tóraǵasynyń birinshi orynbasary jańadan qurylǵan Ulttyq qoǵamdyq senim keńesine qatysty pikir bildirdi.
«Prezıdent Jarlyǵymen Ulttyq qoǵamdyq senim keńesi quryldy. Bul elimizde azamattyq qoǵamdy damytý jolynda jasalǵan naqty qadam. Memleket basshysy atap ótkendeı, birtutas el bolyp qalý - bizdiń basty baǵdarymyz. Judyryqtaı jumylyp, qoǵamnyń barlyq ókilderin, sonyń ishinde jastardy da dıalogqa shaqyryp, birigip áreket etsek qana kózdegen maqsattarymyzǵa qol jetkizetinimiz anyq. Ulttyq qoǵamdyq senim keńesi azamattyq qoǵamnyń damýyna tyń berip qana qoımaı, jańǵyrý men reformalardyń tyń ózegine de aınalady dep oılaımyz. Mıllıondaǵan qazaqstandyqtardyń pikir men kózqarasyn bildiretin demokratııalyq kúshterdiń jalpyulttyq koalıtsııasy osyndaı mańyzdy kezeńde Elbasy saıasatynyń sabaqtastyǵyn qamtamasyz etip, Prezıdentimizdiń elimizdiń aldyna qoıyp otyrǵan maqsattaryna jetýimizge óziniń laıyqty úlesin qosady dep senemiz», - dedi Máýlen Áshimbaev koalıtsııa otyrysynda.
Atap aıtqanda, búgingi otyrys barysynda Demokratııalyq kúshterdiń «Qazaqstan-2050» jalpyulttyq koalıtsııasy prezıdenttik saılaýdyń nátıjelerin qoldady.
