Ulttyq kitaphanadaǵy múmkindigi shekteýli jandarǵa arnalǵan zalda «Bir el - bir kitap» aktsııasy aıasynda konkýrs ótti
ASTANA. Qyrkúıektiń 23-i. QazAqparat - Búgin Ulttyq akademııalyq kitaphananyń múmkindigi shekteýli jandarǵa arnalǵan zalynda «Bir el - bir kitap» aktsııasy aıasynda Braıl júıesi boıynsha oqý jáne jazýdan baıqaý ótti.
Buǵan deıin habarlanǵandaı atalǵan shara qyrkúıektiń 22-sinde bastaldy. Jobanyń maqsaty - qazaq ádebıetindegi qundy týyndylardy nasıhattaý, jastarǵa rýhanı-patrıottyq tárbıe berý, oqyrmandardy kitap oqýǵa, kitaphanaǵa tartý. Aǵymdaǵy jyly tórtinshi ret ótkizilip otyrǵan shara barysynda jalpyhalyqtyq oqýǵa Juban Moldaǵalıevtyń «Men qazaqpyn» poemasy tańdaldy. Aktsııa kitaby anyqtalǵan soń elimizdiń barlyq aımaqtarynda J. Moldaǵalıev shyǵarmashylyǵymen tanystyrý sharalary ótkizildi.
Búgin kóz janary boıynsha 20 múgedek osy bir sharaǵa óz úlesterin qosty. Kitaphana qyzmetkerleri olarǵa J.Moldaǵalıevtiń shyǵarmashylyǵy, ómiri týraly baıandap, shyǵarmalarynan úzindiler oqydy. Osydan keıin baıqaýǵa qatysýshylar Braıl júıesi boıynsha oqý jáne jazý sheberlikterin ortaǵa saldy. Barlyq konkýrsqa qatysýshylar baǵaly syılyqtarmen, alǵys hattarmen marapattaldy.
