Ulttyq keńestiń úshinshi otyrysyndaǵy bastamalardyń birazy júzege asty - Erlan Qarın

NUR-SULTAN. QazAqparat – Ulttyq qoǵamdyq senim keńesiniń tórtinshi otyrysynda QR Prezıdentiniń kómekshisi Erlan Qarın bilim berý jáne densaýlyq saqtaý salalaryn jetildirý boıynsha usynylǵan bastamalardyń birazy júzege asqanyn aıtty, dep habarlaıdy QazAqparat tilshisi.

«Kólik ıelerine júrgizýshi kýáligin talap etpeıtin, tek qana jeke kýálikti qoldaný múmkindikterin qarastyratyn jol júrý normalary boıynsha zań jobasy Májilis qaraýyna usynyldy. Budan bólek, Ulttyq keńestiń úshinshi otyrysynda bilim berý jáne densaýlyq saqtaý salalaryn jetildirý boıynsha usynylǵan bastamalardyń biraz bóligi júzege asyp otyr. Sonyń ishinde pedagogıkalyq baǵyttar boıynsha oqýǵa túsýshi úmitkerler úshin irikteý talaptary kúsheıtildi. Osy baǵytta bilim alatyn bakalavrıat stýdentteriniń shákirtaqysy 60 paıyzǵa, al doktoranttardyń shákirtaqysy 46 paıyzǵa ulǵaıdy. Joǵary oqý oryndarynda professorlyq-oqytýshylyq quramnyń ortasha eńbekaqysy 2019 jylmen salystyrǵanda 27 paıyzǵa ósti», - dedi E. Qarın.

Onyń sózine qaraǵanda, Bas memlekettik sanıtar dárigerdiń mártebesi men quzyrettiliginiń keńeıýin qamtıtyn «Halyq densaýlyǵy jáne densaýlyq saqtaý júıesi týraly» Kodeks qabyldandy. Sanıtarlyq-epıdemıologııalyq baqylaý komıteti quryldy, «Bıologııalyq qaýipsizdik týraly» zań jobasy daıyndaldy.

«Osynyń barlyǵy Ulttyq keńestiń úshinshi otyrysynda jarııalanǵan bastamalar», - dedi Erlan Qarın.