Ulttyq keńestiń quramy ózgerip turý kerek – Erlan Saırov
Áýeli Erlan Saırov halyq Ulttyq keńeske óz usynys-shaǵymdaryn qalaı jetkizetinin túsindirdi.
«Ulttyq keńes músheleriniń barlyǵynyń áleýmettik jelide akkaýnttary bar. Sol akkaýnttar arqyly habarlasýǵa bolady. Ulttyq keńestiń hatshysy Erlan Qarın jýyqta keńestiń jeke akkaýnty ashylatynyn aıtty. Osy akkaýnt arqyly da eldiń pikiri qabyldanatyn bolady», - deıdi qoǵam qaıratkeri.
Sarapshynyń pikirinshe, Ulttyq keńes quramy ýaqyt talabyna saı ózgerip turýy kerek.
«Keńestiń quramy meniń jeke pikirim boıynsha, ózgerip turýy qajet. Qajet bolsa, músheler sany kóbeıýi de múmkin. Al jumysyna úlgere almaı, qoǵamnyń senimin aqtamaǵandar ornyn basqalarǵa berýi kerek. Biz tsıfrlyq zamanda ómir súrip jatqandyqtan, 40-tan astam múshe degen shartty dúnıe. Sovet zamanyndaǵy sııaqty qasań rejimnen aýlaq bolýymyz kerek. Keńestiń jumysyna 18 mln adamnyń barlyǵynyń qatysýǵa quqyǵy bar. Eldiń oı-pikirin durys jetkize almaǵan adamdar ornyn bosatady. Mysaly men ózim keńes jumysyndaǵy mıssııam oryndalmaı jatsa, óz ornyma basqa adamdy usynamyn», - dedi ol.
Foto: Mýhtar Holdorbekov
