Ulttyq keńeste Prezıdent birqatar máselege egjeı-tegjeıli toqtaldy - sarapshy
«Búgin Memleket basshysy Qasym-Jomart Toqaevtyń qatysýymen Ulttyq qoǵamdyq senim keńesiniń 6-otyrysy ótti. Prezıdent túrli salalardaǵy máselelerge qatysty egjeı-tegjeıli toqtaldy. Bul turǵyda Ulttyq qoǵamdyq senim keńesiniń osy ýaqytqa deıingi zor úlesi týraly aıtyldy. Shynymen de Keńes bılik pen azamattyq qoǵam arasynda dıalog alańyna aınaldy. Eki jyl ishinde Ulttyq keńes músheleriniń bastamalary boıynsha 90-nan astam normatıvtik-quqyqtyq akti qabyldanǵan. Sonyń arasynda Zańdar, Prezıdent Jarlyǵy men Úkimet qaýlylary, mınıstrlikterdiń buıryqtary qamtylyp otyr. Memleket basshysy reformalardyń basty maqsatyn túsindirdi. Bul rette birqatar mańyzdy bastamalardy kópshilik nazaryna usyndy», - Tóleýtaı Raqymbekov.
Osy oraıda ol búgin Prezıdent tarapynan eldi meken ákimderine qatysty mańyzdy usynymdar bolǵanyn jetkizdi.
«Budan bólek, Qasym-Jomart Kemeluly bilim berý salasyndaǵy máselelerge qatysty tapsyrmalar berdi. Bul baǵytta 2025 jyldyń sońyna deıin 1 myń mektep salý týraly tapsyrmasyna toqtaldy. Memleket basshysy turǵyn úı alaptary boı kótergen kezde onymen birge mindetti túrde mektep pen balabaqsha jáne basqa da áleýmettik nysandardyń salynýy aıryqsha nazarda bolýy kerek ekenin qadap aıtty. Qazirgi qurylys qarqynyn eskersek, bul másele óte ózekti», - dedi Aýyl sharýashylyǵy mınıstriniń keńesshisi.
Onyń aıtýynsha, Ulttyq qoǵamdyq senim keńesiniń otyrysynda tsıfrlandyrýǵa baılanysty máseleler nazardan tys qalmady. Prezıdent aqparattyq bazalardyń arasynda baılanys joq ekenin synǵa aldy. Osynyń saldarynan turǵyndardan mór basylǵan qaǵaz anyqtama qajet etedi. Bıyl halyqqa qyzmet kórsetý ortalyqtary osyndaı 2 mıllıonnan astam qujat bergen.
«Munymen qosa, Prezıdent bankterdiń kepil saıasatyn jetildirý jáne baǵalaý qyzmetin retteý máselesine arnaıy toqtaldy. Sonymen qatar, qandastarymyzdyń óz atajurtyna oralý máselesi týraly Elbasy birqatar mańyzdy tarıhı sheshim qabyldaǵany belgili. 30 jyl ishinde 1,5 mln-nan astam qazaq Qazaqstanǵan keldi. Bul rette Qasym-Jomart Toqaev Úkimetke Uly kóshtiń bastalýyna jol ashqan datany ataýly kúnder kúntizbesine qosý máselesin qarastyrýdy júktedi», - dedi Tóleýtaı Raqymbekov.
«Prezıdenttiń taǵy bir mańyzdy tapsyrmasy shekaralas aımaqtardy damytýǵa qatysty bolyp otyr. Óıtkeni bul taqyryp ulttyq qaýipsizdikke tikeleı baılanysty. Maman retinde bul másele meni de alańdatyp júrgen edi. Ózderińiz bilesizder, shekara boıyndaǵy eldi mekenderden turǵyndar qonys aýdaryp jatyr. Sondyqtan osy máselege qatysty Memleket basshysy Úkimetke shekaralas aımaqtardy damytý jónindegi usynys engizýdi júktedi», - dedi sarapshy.
