Ulttyq keńes: JOO granttaryn aldymen tabysy az otbasylardan shyqqan jastarǵa bólý usynyldy
NUR-SULTAN. QazAqparat – Ulttyq qoǵamdyq senim keńesiniń múshesi Asylbek Qojahmetov JOO-lar boıynsha granttardy aldymen tabysy tómen otbasylardan shyqqan jastarǵa bólýdi usyndy, dep habarlaıdy QazAqparat tilshisi.
«Men joǵary bilimdi damytýdyń kontseptýaldy usynystaryn ázirledim. Bul salany keńirek baǵalaý úshin elde úsh ańyz baryn atap ótý kerek: birinshi ańyz – «elde stýdentterdiń sany óte kóp». Shynynda da mıllıon halyqqa eseptegende bizde stýdentter sany AQSh-tan qaraǵanda eki ese, Malaızııadan qaraǵanda bir jarym ese az. Ekinshi ańyz – «Qazaqstanda qazirgi tańda JOO-lar sany óte kóp». Shyntýaıtynda Qazaqstanda AQSh, Frantsııa men Reseıden qaraǵanda (halyq sanymen eseptegende) olardyń sany az. Úshinshi ańyz – Qazaqstanda bilim sapasy tıimsiz. Aıtarym bizde bul salaǵa bólinetin qarajat tym az. Bul salaǵa qarajat bólý jaǵynan (3,3 paıyz) álemde biz 39- oryndamyz», - dedi Asylbek Qojahmetov Ulttyq qoǵamdyq senim keńesiniń kezekti otyrysynda.
Onyń aıtýynsha Malaızııa qorǵanysqa qaraǵanda bilimge 13 ese, Koreıa 8 ese, Grýzııa 5, Qazaqstan 3 ese artyq qarajat bóledi.
Osyndaı máselelerdi tize kele Ulttyq keńes múshesi Asylbek Qojahmetov JOO-larda bilim granttaryn tabysy az otbasylardan shyqqan jastarǵa berý kerektigin aıtyp ótti.
«Máselen bıyl Oksford pen Kembrıdj ýnıversıtetterine sol eldiń Úkimeti kedeı otbasylardan shyqqan balalardyń úlesi jalpy abıtýrıentterdiń 7 paıyzyna teńesýi kerektigin tapsyrdy. Áleýmettik lıft jumys isteýi úshin biz de memlekettik granttardy tabysy az otbasylardan shyqqan balalarǵa berýimiz kerek», - dedi ol.
