Ulttyq keńes sheshimin tappaı jatqan máselelerdi talqylaýǵa múmkindik ashty - Aıgúl Orynbek
«Qazirgi ýaqytta Prezıdent Ákimshiligimen, mınıstrlermen kóptegen áleýmettik máseleni kóterip, tikeleı jumys istep jatyrmyz. Jaqsy múmkindikter jasalǵan. Zoom arqyly tikeleı efırde aıyna 2 ret mınıstrlermen kezdesip, ár óńirde bolyp jatqan máselelerdi ashyq talqylaý júrgizilýde. Al bul «Halyq únine qulaq asatyn memleket» tujyrymdamasynyń júıeli túrde naqty jumys istep jatqanynyń belgisi. Buryn kóptegen máselelerdi mınıstrlikterdiń tarapyna ashyq aıta almaı júrsek, qazir birge talqylap, sheshý tetikterin qarastyrýdamyz. Osyǵan deıin ákimder jasalmaǵan jumystaryn jasyrýǵa tyryssa, qazir jergilikti jerde sheshimin tappaǵan kúrdeli máselelerdi talqylap otyrýǵa múmkindik jasalyp otyr», - dedi ol.
Sonymen qatar Aıgúl Orynbek osy ýaqytqa deıin elimizdiń Bilim jáne ǵylym, Aýyl sharýashylyǵy, Densaýlyq saqtaý mınıstrlerimen birqatar naqty másele talqylanǵanyn atap ótti.
«Bilim jáne ǵylym mınıstri Ashat Aımaǵambetovpen, Aýyl sharýashylyǵy mınıstri Saparhan Omarovpen, Densaýlyq saqtaý mınıstri Alekseı Tsoımen Zoom arqyly onlaın kezdesý ótkizdik. Sol kezde Saparhan Omarovpen qazirgi ýaqytta ońtústiktegi baǵasy turaqtalmaı otyrǵan maqta máselesin, Alekseı Tsoımen dár-dármek máselesin talqyladyq. Aldaǵy ýaqytta oryn alýy múmkin koronavırýstyń jańa tolqyny kezinde jazdaǵydaı dárilik zattar tapshylyǵyn boldyrmaý jaıyn qozǵadyq. Qazirgi ýaqytta osy máselege oraı qaı jerge qansha aqsha aýdarylǵanyn, qandaı dári-dármek jetispeı jatqanyn zerdelep otyrmyz», - dedi Aıgúl Orynbek.
