Ulttyq keńes: Raýan Kenjehanuly balalar arasyndaǵy sýıtsıd máselesin kóterdi
«Taǵy bir nazar aýdaratyn másele - balalardyń jan saýlyǵyna qatysty. Atap aıtsaq, mektep oqýshylary arasyndaǵy sýıtsıd, ıaǵnı ózine qol salýdyń jıiligi. Ókinishke qaraı, bul kórsetkish boıynsha Qazaqstan dúnıe júzindegi jaǵdaıy eń nashar elder qatarynda. Jyl saıyn 170-ten asa qazaqstandyq jasóspirim ózderin ómirden aıyrady. Mamandardyń esebinshe aıaqtalmaǵan jáne túrli sebeppen tirkelmegen sýıtsıdke talpynys sany budan 20 ese kóp. Ashyǵyn aıtqanda, balalar arasyndaǵy mundaı jaǵdaı - qoǵam saýlyǵynyń óte soraqy kórsetkishi», - dep atap ótti spıker Ulttyq qoǵamdyq senim keńesiniń onlaın formattaǵy 3-otyrysynda.
Sonymen birge, spıker balalar arasyndaǵy sýıtsıdtiń aldyn alýǵa baǵyttalǵan ortaq baǵdarlama ne biryńǵaı ádisteme jasalmaǵanyn aıtty.
«Qurmetti Qasym-Jomart Kemeluly! Siz bul másele týraly birneshe ret aıttyńyz, tapsyrma da berdińiz. Alaıda elimizde bilim berý jáne densaýlyq saqtaý júıelerin qamtıtyn, barlyq deńgeıde basshylyqqa alynýy tıis balalar arasyndaǵy sýıtsıdtiń aldyn alýǵa baǵyttalǵan ortaq baǵdarlama ne biryńǵaı ádisteme áli qabyldanbady. Biz óz tarapymyzdan bilikti qazaqstandyq jáne bedeldi halyqaralyq psıholog mamandardy jumyldyryp, «Densaýlyq jáne ómir daǵdylary» atty arnaıy baǵdarlama daıyndadyq. Ondaǵy amaldar men ádister birneshe aımaqta synaqtan ótti. Qajet bolsa, baǵdarlamany tıisti mınıstrlikke tapsyrýǵa daıynbyz. Tek el aımaqtarynyń barlyǵyn, oqýshylar men ustazdardy, psıhologtar men ata-analardy jan-jaqty qamtıtyn belsendi is-qımyl bastaýdy suraımyz», - dedi Raýan Kenjehanuly.
Buǵan deıin Raýan Kenjehanuly Qazaqstan mektepterin bir aýysymda oqý rejımine kóshirý joldaryn aıtty jáne Qazaqstanda ulttyq mektep úlgisin jasaýdy usyndy.
Aıta keteıik , QR Prezıdenti Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń úshinshi otyrysy ótip jatyr. Kezekti otyrys adamı kapıtaldy damytýǵa, atap aıtqanda, bilim berý, densaýlyq saqtaý máselelerine arnalǵan.
