Ulttyq keńes otyrysynda Prezıdent qoǵamdaǵy mańyzdy máselelerdi kóterdi - Aıgýl Soloveva

NUR-SULTAN. QazAqparat – Ulttyq qoǵamdyq senim keńesiniń tórtinshi otyrysynda Memleket basshysy qoǵamda kóterilip júrgen máselelerge erekshe nazar aýdardy. Bul týraly Ekologııalyq uıymdar qaýymdastyǵynyń basqarma tóraǵasy Aıgúl Soloveva aıtty, dep habarlaıdy QazAqparat tilshisi.

«Ulttyq keńes otyrysynda Prezıdent negizgi saıası reformalarǵa toqtaldy. Onyń ishinde saıası partııalardyń Parlament saılaýyna qatysýy bóligine nazar aýdardy. Atalǵan keńes qoǵamdyq uıym bolǵandyqtan, Memleket basshysy adam quqyqtaryn qorǵaý máselesine negizgi ekpindi qoıdy. Osy oraıda bala quqyǵyn, múmkindigi shekteýli jandar quqyǵyn qorǵaýǵa qatysty toqtaldy. Osynyń barlyǵy áleýmettik jelilerde, qoǵamda talqylanyp júrgen máseleler edi», - dedi A. Soloveva.

Sonymen qatar ol keńes otyrysynda halyqaralyq kún tártibindegi máseleler qaralǵanyn aıtty.

«Eńbek mıgranttary men qonys aýdarýshylarǵa qatysty taqyryp qozǵaldy. Bul taqyryp adam quqyǵyn qorǵaýǵa tikeleı baılanysty. Meniń oıymsha, Prezıdent óz sózinde el ishinde kóterilgen naqty qoǵamdyq mańyzdaǵy máselelerge aıryqsha toqtaldy. Bul óz kezeginde Memleket basshysy halyqtyń pikirin, álemdik arenadaǵy jaǵdaıdy zerdelep, oǵan mán berip júrgenin bildiredi. Osy oraıda bizdiń Prezıdenttiń BUU-daǵy jumysy boıynsha úlken tájirıbesi bar ekenin upytpaýymyz kerek. Sáıkesinshe, Memleket basshysy barsha órkenıetti elderde bar kópshilik qabyldaǵan álemdik normalardan Qazaqstan alshaqtamaýy kerektigin túsinedi», - dedi Aıgýl Soloveva.

Aıta keteıik, Ulttyq qoǵamdyq senim keńesiniń tórtinshi otyrysynda Prezıdent Qasym-Jomart Toqaev múmkindigi shekteýli jandar úshin memlekettik yntalandyrý tetikteri qarastyrylýy kerektigin aıtqan bolatyn.

Sondaı-aq Memleket basshysy eńbek mıgratsııasy máselesin kóterdi.