Ulttyq keńes múshesi aýylda ınnovatsııany damytýdyń tetigin aıtty

NUR-SULTAN. QazAqparat – Ulttyq qoǵamdyq senim keńesiniń múshesi Tóleýtaı Rahymbekov aýyldy jerlerde ınnovatsııany damytý úshin bilimniń ulttyq júıesin qurý boıynsha baǵdarlama ázirleýdi usyndy, dep habarlaıy QazAqparat tilshisi.

«Bilim berý salasynda jaǵymdy jańalyqtar da bar. Qazirgi tańda eki agrarlyq ýnıversıtetke ulttyq agrarlyq jáne astanalyq S.Seıfýllın atyndaǵy Agrotehnıkalyq ýnıversıtetke ǵylymı zertteý ýnıversıteti mártebesin berý týraly Úkimet qaýlysynyń jobasy memlekettik organdardyń qaraýyna engizildi. Aýyldy jerlerde ınnovatsııany sátti qoldaný úshin bilimdi taratý júıesi óte mańyzdy. Biraq búgin de ol da shashyrańqy kúıde. Aýyldy jerlerde bilim taratýdyń ulttyq júıesin qurý boıynsha baǵdarlama ázirlep, onyń biryńǵaı operatory retinde ulttyq agrarlyq ǵylymı bilim berý ortalyǵyn anyqtaýdy usynamyn», - dedi Tóleýtaı Rahymbekov Ulttyq qoǵamdyq senim keńesiniń kezekti otyrysynda.

Onyń aıtýynsha búgin de ǵylymı jetistikterdiń dál osy bilim taratý júıesiniń damýyna tikeleı baılanysty.

«Ókinishke qaraı aldaǵy jylǵa agrarlyq ǵylymdy qarjylandyrý kólemi josparlanǵan deńgeıden 6 ese kem somaǵa qysqartylyp jatyr. Árıne búgingi jaǵdaıda bıýdjet shyǵystaryn azaıtý qajettigin tolyǵymen túsinemiz. Biraq ǵylymdy ortasha elder deńgeıinen 12,5 ese az qarjylandyrýdy ońtaıly sheshim dep eseptemeımin», - dedi ol.