Ulttyq keńes músheleri Qaraǵandy oblysynda Prezıdent bastamalaryn talqylady
UQSK músheleri óńirge sapar barysynda oblys ákimi Jeńis Qasymbekovpen kezdesti. Kezdesýde ákim ekonomıkalyq damýdyń negizgi baǵyttary men negizgi ınfrastrýktýralyq jobalardyń júzege asyrylýy týraly aıtty.
Odan keıin Qaraǵandy oblysynyń qoǵamdyq keńes ókilderimen kezdesý boldy. Kezdesýge qatysýshylar qoǵam belsendileri, sarapshylar jáne jergilikti atqarýshy organdar ókilderimen aradaǵy qarym-qatynastyń tıimdiligin arttyrý jóninde oılarymen bólisti. Odan bólek, kezdesý kezinde monoqalalardy damytý, ishki jáne syrtqy kóshi-qondaǵy úrdister týraly sóz qozǵaldy.
Sonymen qatar «Bıznes Bastaý» jobasynyń qatysýshylarymen kezdesý ótti. Onda óńirde shaǵyn kásipkerlikti ashý jáne damytý suraqtary talqylandy.
Sapar barysynda Ulttyq keńes músheleri Abaı aýdanynda boldy. Onda olar aýyldyq okrýg ákimderimen kezdesip, aýyl ákimderin tikeleı saılaýdy uıymdastyrýǵa daıyndyq úderisin talqylady.
Odan keıin Kóksý aýylynda UQSK músheleri «Shans» sharýa qojalyǵynyń jumysymen tanysty. Kezdesý kezinde sharýalar aýyl sharýashylyǵy, agroónerkásiptik keshendi memlekettik qoldaý sharalary týraly suraqtardy kóterdi.
Sapar barysynda UQSK músheleri qoǵam belsendilerine, «Bıznes Bastaý» jobasynyń qatysýshylaryna, sharýalarǵa saıası jáne ekonomıkalyq baǵyttar boıynsha prezıdenttik bastamalardyń júzege asyrylýy týraly aıtyp berdi.
Jaqyn arada Ulttyq keńes músheleri elimizdiń basqa óńirlerine de sapar jasaýdy josparlap otyr.
