Ulttyq keńes mańyzdy dıalogtyq alańǵa aınalady – Berik Ábdiǵalıuly

NUR-SULTAN. QazAqparat – Jańadan qurylǵan Ulttyq qoǵamdyq senim keńesi saıası qoǵamdaǵy eń ózekti máseleler boıynsha usynystar berýi tıis. Bul týraly «Kıeli Qazaqstan» ǵylymı-zertteý ortalyǵynyń basshysy, Ulttyq qoǵamdyq senim keńesiniń múshesi Berik Ábidǵalıuly aıtyp berdi, dep habarlaıdy QazAqparat tilshisi.

«Ulttyq keńes qurý Prezıdenttiń saılaýaldy platformasynda kórsetilgen. Bir jaǵynan qoǵamdaǵy túrli pikirlerdi eskerip, soǵan usynystardy jınaý bolsa, ekinshi jaǵynan negizgi dıalogtyq alań jasaý, mamandarmen, sarapshylarmen aqyldasý boıynsha qurylady degen jospar bar. Onyń quramynda qoǵamdyq pikirdi qalyptastyryp júrgen qaıratkerler, jýrnalıster, blogerler, saıasatkerler bar. Menińshe bul da bir Prezıdent janyndaǵy konsýltatıvti-keńesshi organ retinde saıası reformalar, áleýmettik, ekonomıkalyq jaǵdaılarǵa baılanysty qajetti jáne elimizdiń damýyna mańyzdy usynystar berip otyrýy tıis», - dedi Berik Ábdiǵalıuly.

Prezıdent Ákimshiliginde arnaıy taldaý júrgizilip, Ulttyq keńestiń 41 múshesi iriktelip alynǵan. Olar jylyna kem degende úsh ret jınalyp, ózekti máselelerdi talqylaýy tıis.

«Jeke ózim rýhanııat, ulttyń damýy, jergilikti memlekettik basqarý, onyń ishinde aýyl máselesi, ákimderdiń jumysy, óńirlik saıasatyna baılanysty tájirıbem men usynystarymdy bólisemin dep oılaımyn. Saıası reformalardyń qajettiligin, lıberaldyq prıntsıpterdi iske asyrýǵa qajettiligin kóterýimiz kerek», - dedi spıker.

Aıta keteıik, Memleket basshysy Qasym-Jomart Toqaev Ulttyq qoǵamdyq senim keńesi týraly Jarlyqqa qol qoıdy. Bul týraly Prezıdent 2019 jyldyń 12 maýsymynda elordadaǵy ulyqtaý rásiminde málimdegen bolatyn.