Ulttyq keńes «Halyq únine qulaq asatyn memleket» tujyrymdamasyn iske asyratyn qurylym retinde qalyptasty - Qoshanov

NUR-SULTAN. QazAqparat – Ulttyq keńes «Halyq únine qulaq asatyn memleket» tujyrymdamasyn tıimdi iske asyratyn qurylym retinde qalyptasty. Bul týraly Ulttyq qoǵamdyq senim keńesiniń 6-otyrysynda QR Prezıdenti Ákimshiliginiń Basshysy Erlan Qoshanov aıtty, dep habarlaıdy QazAqparat tilshisi.

«Bıyl Ulttyq keńestiń quramy aımaqtaǵy belsendi azamattarmen tolyqty. Sonyń nátıjesinde keńes aıasynda birqatar óńirlik máseleler muqııat zerdelenýde. Osy baǵyttaǵy jumys aldaǵy ýaqytta da jalǵasyn tabatyn bolady. Keńes músheleri naqty usynystar ázirleýmen birge reformalardy oıdaǵydaı júzege asyrýǵa atsalysyp keledi. Áriptesterimiz Parlament palatalary men mınıstrlikter janyndaǵy jumys toptarynyń jıyndaryna da qatysýda. Osylaısha Ulttyq keńes Prezıdentimizdiń «Halyq únine qulaq asatyn memleket» tujyrymdamasyn tıimdi iske asyratyn qurylym retinde qalyptasty», - dedi otyrysty ashqan Erlan Qoshanov.

Onyń atap ótýinshe, pandemııa jaǵdaıyndaǵy karantındik shekteýlerge baılanysty keńes otyrysy onlaın formatta ótkizilýde. Jıynǵa Ulttyq keńes músheleri 7 óńirden qatysyp otyr.