Ulttyq keńes: Aýyl ákimine úmitkerdi irikteý talaptary ózgeredi

NUR-SULTAN. QazAqparat – Ulttyq qoǵamdyq senim keńesiniń múshesi, sarapshy Marat Shıbutov aýyl ákiminiń saılaýyna úmitkerdi irikteý jáne úgit-nasıhat júrgizý talaptaryna naqty qandaı ózgerister engiziletinin aıtty, dep habarlaıdy QazAqparat tilshisi.

«Aleksandr Danılov ekeýmiz kelisip aýyl ákimderin saılaý boıynsha zertteý júrgizgen bolatynbyz. Men ıdeıa aıtyp, Aleksandr sony iske asyrdy. Zertteýge Prezıdenttiń jastar kadrlyq rezerviniń músheleri tartylǵan. Aýyl ákimderiniń saılaýyna kandıdat retinde túskenderden, baqylaýshylardan, partııa fılıaldarynyń basshylarynan, aýdan ákimdiginiń ókilderinen jaýap aldy. Solardyń aýyl ákiminiń saılaýyna bergen baǵasyn negizdeý úshin 5 oblysqa issaparmen bardy. Osy jumystardyń qorytyndysy boıynsha úlken materıal paıda boldy. Aleksandr solardy jınaqtap baıandama jasady da, sonyń negizinde usynystar daıyndadyq», - deıdi sarapshy.

Onyń sózinshe, Prezıdent bular joldaǵan úsh usynysty maquldaǵan.

«Usynystar daıyndaǵan kezde baıandamadan bólek, meniń zertteý jumystaryma Gúlmıra Eeleýovanyń zertteýlerine arqa súıedik. Sonyń nátıjesinde Prezıdent biz joldaǵan úsh usynysty maquldady.

Birinshi usynys aýyl ákimdigine úkmetkerlerge qoılatyn talaptyń ishinen joǵary bilimi bar bolý kerek degen kedergini alyp tastaý bolatyn. Onyń ornyna orta-arnaıy dep qaldyrdyq. Óıtkeni, aýyldarda bul másele keńinen kezdesedi. Joǵary bilimi barlar aýylda kóp turaqtamaıdy. Ondaǵy qolynan is keletinderdiń kóbi orta nemese arnaıy bilim barlar. Gúlmıra Eleýovanyń osy usynysy qabyldandy», - deıdi Marat Shıbutov.

Ulttyq keńes múshesi Prezıdent saılaý aldyndaǵy úgit-nasıhat merzimin uzartý týraly usynysty da oń baǵalaǵanyn aıtady.

«10 kún degen óte az. Meniń usynysym osy týraly bolatyn. Áli naqtylanyp jatyr, bálkim 20 nemese 30 kún bolatyn shyǵar. Óıtkeni keıbir aýyldyq okrýgterdiń quramynda birneshe aýyl bar. Solardyń bárin aralap shyǵý ońaı emes.

Sondaı-aq, Prezıdent aýyl ákiminiń saılaýyna túskisi keletinder úshin qurylatyn saılaý qorynyń somasyn saralap belgileý týraly usynysymyzdy qoldady. Qazir bul soma bárine ortaq – 200 myń teńge. Saılaý qorynyń somasy ákimi aýysatyn eldi mekenniń mólsherine qaraı belgilenýi kerek. Sebebi eldi meken shaǵyn bolsa, turǵyndarynyń sany 500-1000 adamnan aspasa, úgit-nasıhat jumystaryna kóp shyǵyn ketpeıdi. Al Almaty oblysyndaǵy Baıserke aýyly sııaqty 25 myń halqy bar aýyldarda 200 myń teńgege eshteńe isteı almaısyń. Memleket basshysy osy úsh usynymyzdy maquldady. Endi Prezıdent Ákimshiligi solardy engizý jumystaryn pysyqtap jatyr», - dedi Ulttyq qoǵamdyq senim keńesiniń múshesi.