Ulttyq keńes 2,5 jylda ne tyndyrdy
«QR Prezıdenti janynan Ulttyq qoǵamdyq senim keńesi qurylǵan tustan beri ne tyndyrdy» degen suraqqa jaýap bersek, birneshe ózgeristi atap ótýge bolady.
Birinshiden, Ulttyq Keńes óziniń ómirsheń ınstıtýt ekenin kórsetti. Ulttyq keńes músheleriniń usynystary eleýli saıası jáne áleýmettik-ekonomıkalyq reformalardan kórinis taýyp jatyr. Memleket basshysynyń keńeske qatysqa kezde bergen tapsyrmalaryn iske asyrý jolynda 90-nan astam normatıvtik-quqyqtyq akti, onyń ishinde 20 Zań qabyldanǵan.
Ekinshiden, Ulttyq keńes «Halyq únine qulaq asatyn memleket» tujyrymdamasyn iske asyrýdyń tıimdi tetigine aınalyp otyr. Atap aıtsaq:
- sheteldikter men zańdy tulǵalarǵa aýyl sharýashylyǵy maqsatyndaǵy jerdi satýǵa jáne jalǵa berýge tyıym salyndy;
– sheteldik jumys kúshin tartý kvotasy qysqartyldy (2019 jylǵy 49 myńnan 2020 jyly 29 myńǵa deıin);
- bolashaq pedagogter men medıtsna mamandarynyń shákirtaqylary 50 myń teńgege deıin, doktoranttardyń stıpendııalary 172 myń teńgege deıin) kóbeıtildi;
- pedagogıkalyq baǵytta joǵary oqýǵa túskisi keletinderge qoıylatyn talaptar kúsheıtildi (UBT- boıynsha shekti ball 60-tan 70 balǵa deıin kóterildi),
- 100% memlekettiń qatysy bar ulttyq, memlekettik joǵary oqý oryndaryn jeke menshikke berýge tyıym salý týraly norma engizildi;
- JOO oqytýshylarynyń, medıtsına qyzmetkerleriniń jalaqysy artty;
- erekshe bilim alýǵa muqtaj balalardy psıhologııalyq-pedagogıkalyq turǵydan qoldaý úshin memlekettik bilim berý tapsyrysyn iske asyratyn normalar bekitildi;
- mektepke deıingi jáne orta bilim berý uıymdarynda múmkindikteri shekteýli balalarǵa bilim berý salasynda jańa tásilder ázirlenip, bekitildi;
- alty óńirde múgedektikti belgileý úshin medıtsınalyq-áleýmettik saraptama júrgizýdiń syrttaı formatyn engizý boıynsha pılottyq joba iske qosyldy;
- áıelder men balalardy zorlyq-zombylyqtan qorǵaý jónindegi bólimshelerdiń shtat sany nyǵaıtyldy
- avtokólik ıelerine kólik júrgizý kezinde tek jeke kýáligin alyp júrýge múmkindik beretin zańnamalyq túzetýler qabyldandy;
- ońtústik óńirlerden soltústik óńirlerge kóshkenderge beriletin sýbsıdııalar mólsheri 2 ese – 35 AEK-ten 70 AEK-ke deıin ulǵaıtyldy;
Úshinshiden, Ulttyq keńes saıası reformalar boıynsha utymdy usynystar kóteretin alańǵa aınaldy.
Memleket basshysy keńes jumysyna qatysa otyryp, saıası reformalardyń 4 paketine bastama retinde kótergeni belgili. Sonyń aıasynda 10 zań qabyldandy. Jýyqta Parlamentte taǵy birneshe zań jobasyn qaraý josparlanyp otyr.
Osy reformalardyń kóbinde Ulttyq qoǵamdyq senim keńesiniń músheler kótergen usynystar kirdi. Sonymen qatar, Ulttyq keńestiń músheleri Májilistiń, mınıstrlikterdiń jumys toptarynyń otyrystaryna tıisti normatıvtik-quqyqtyq aktilerdi ázirleý kezinde belsendi qatysty.
Tórtinshiden, Ulttyq keńes bılik pen qoǵam arasyndaǵy tikeleı dıalog alańy retinde jumys isteı bastady. Memleket basshysy keńestiń otyrystarynyń bárine tikeleı qatysyp keledi. Buǵan qosa Qasym-Jomart Toqaev Ulttyq keńes múshelerimen jeke-jeke suhbattasý tájirıbesin tıimdi paıldalanyp júr. Osy kezdesýler aıasynda 28 qoǵam belsendisi men sarapshy Prezıdentpen júzdesip, óz usynystaryn jetkizýge múmkindik aldy.
Mınıstrler de saladaǵy ózekti máselelerdi Ulttyq keńes múshelerimen talqylaýdy ádetke aınaldyryp keledi. Mınıstrlermen onlaın formatta 20 kezdesý ótkizildi.
Besinshiden, Ulttyq keńes qoǵam arasyndaǵy dıalogty óńirlik deńgeıde de ilgeriletip júr. Bıylǵy mamyr aıynan beri keńes músheleri Mańǵystaý, Soltústik Qazaqstan jáne Qaraǵandy oblystaryna baryp, sondaǵy belsendilermen kezdesip qaıtty.
Óńirlermen júrgizilgen jumystyń nátıjesi bolsa kerek, Ulttyq keńestiń quramyna Aqtóbe oblysynan Táttigúl Talaeva, Túrkistan oblysynan Bórihan Nurmuhamedov, Mańǵystaý oblysynan Ýaıs Ersaıynuly qabyldandy. Bul Ulttyq keńestiń kún tártibine óńirlik deńgeıdegi máselelerdiń jıi shyǵýyna ásert etýde.
Altynshydan, Ulttyq keńes músheleri reformalardy iske asyrý barysyna monıtorıng júrgizip otyr. Ulttyq qoǵamdyq senim keńesiniń sarapshylary saıası reformalar, Memleket basshysynyń áleýmettik-ekonomıkalyq bastamalaryn iske asyrý, aýyl ákimderiniń tikeleı saılaýyn ótkizý jóninde analıtıkalyq baıandamalar daıyndady. Sondaı-aq beıbit jınalystar týraly jańa Zańnyń qoldanysyna sholý jasady. Osy baıandamalar negizinde reformalardyń sapasyna baǵa berilip, birqatar usynym berildi.
