Ulttyq qaýipsizdik týraly jańa zańnyń redaktsııasynda qaýipsizdiktiń búgingi basty qaterleri aıqyndaldy - B. Muhametjanov
ASTANA. 14 jeltoqsan. QazAqparat /Qanat Mámetqazyuly/ - Ulttyq qaýipsizdik týraly jańa zańnyń redaktsııasynda qaýipsizdiktiń búgingi basty qaterleri aıqyndaldy. Búgin QR Parlamenti Senatynyń jalpy otyrysynda «Qazaqstan Respýblıkasynyń ulttyq qaýipsizdigi týraly» jańa redaktsııada ázirlengen zań jobasyna qatysty qosymsha baıandama jasaǵan senator Baýyrjan Muhametjanov osylaı málimdedi.
«Biz búgin asa qaǵıdatty ári qajetti zańdy qabyldaǵaly otyrmyz. Qujat elimizdiń ulttyq qaýipsizdigin qamtamasyz etýge baǵyttalady. Al qoldanystaǵy bul zań osydan 12 jyl buryn qabyldanǵan edi. Sodan bergi kezeńde qoldanystaǵy qujattyń eskirgenin jáne búgingi kún talaptaryna jaýap bermeıtinin aıtýǵa týra keledi. Máselen, osy ýaqyt aralyǵynda bizdiń elimiz de, búkil álem de aıtarlyqtaı ózgeriske ushyrady. Ulttyq qaýipsizdikke qatysty bir qaterler ózderiniń mánin joısa, keıbir qaterler jańadan paıda boldy jáne ózektene tústi. Osyǵan oraı, ulttyq qaýipsizdikti qamtamasyz etýge baılanysty memlekettik organdardyń qyzmetin retteý qajettiligi týyndalyp otyr», - dedi B. Muhametjanov.
Onyń aıtýynsha, jańa zańnyń ıdeologııasy elimizdiń ulttyq qaýipsizdigin qamtamasyz etý jáne ulttyq múddeni qorǵaý baǵytyndaǵy Memleket basshysynyń aıqyndaǵan júıeli saıası baǵdarynan týyndaıdy. Qujatty ázirleý barysynda birqatar sheteldik jáne otandyq tájirıbeler zerdelengen jáne zań birneshe basty maqsatty qamtıdy.
«Birinshiden, ulttyq qaýipsizdiktiń basty qaterlerin aıqyndaý. Ekinshiden, memleketimizdiń basty ulttyq múddelerin ózektendire túsý. Úshinshiden, memlekettik organdardyń ulttyq qaýipsizdikti qamtamasyz etýdegi jaýapkershilik quzyretin júıeleý jáne naqtylaý. Bul rette zańnamada ulttyq qaýipsizdikti qamtamsyz etý isindegi barlyq memlekettik organdardyń birinshi basshylarynyń jaýapkershiligi erekshe aıtylady. Tórtinshiden, ulttyq qaýipsizdikti qamtamasyz etý boıynsha erekshelengen memlekettik organdar men basqa da memlekettik organdardyń qyzmetindegi úılesimdilik pen kelisýshilik qamtylady», - dedi senator. Depýtattyń sózine qaraǵanda, qabyldanǵan zańda ekonomıkalyq sheshimder, onyń ishinde memleketústi organdar sheńberindegi sheshimder qabyldaý barysyndaǵy Qazaqstannyń ulttyq múddelerin saqtaý qajettiligine basa nazar aýdarylady. «Ártúrli ıntegratsııalyq sıpattaǵy ratıfıkatsııalyq zańdardy qabyldaý barysynda buǵan ulttyq múddeni saqtaý turǵysynan kelý kózdeledi», - dedi B. Muhametjanov.
