Ulttyq qaýipsizdik týraly jańa zań qabyldandy
ASTANA. 14 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń ulttyq qaýipsizdigi týraly» jańa redaktsııada ázirlengen zańdy qabyldady.
Qujat Memleket basshysynyń qol qoıýyna jiberiledi.
Zań Elbasy N. Nazarbaevtyń tikeleı tapsyrmasymen ázirlenip elimizdiń ulttyq qaýipsizdigin qamtamasyz etýdiń tıimdi quqyqtyq tetigin jasaýǵa baǵyttalady. Esterińizge sala keteıik, aǵymdaǵy jyldyń 15 naýryzyndaǵy Qaýipsizdiń Keńesiniń otyrysynda Prezıdent Úkimetke osyndaı tapsyrmany júktegen bolatyn. Ulttyq qaýipsizdik komıteti tóraǵasy orynbasary Ǵusman Ámirınnyń aıtýynsha, qujattyń negizgi maqsaty ulttyq qaýipsizdik júıesin nyǵaıtý jáne qazirgi kúnniń qaýip-qaterlerine júıeli túrde qarsy áreket etý máselelerin jańa deńgeıge shyǵarý bolyp tabylady. Osyǵan baılanysty, zańda qaýipsizdikke tónetin jańa qaterler eske alynyp, ulttyq múddeler naqtylandy. «Birinshiden aqparattyq qaýipsizdik salasynda qaýipter anyqtaldy. Taıaý Shyǵystaǵy oryn alyp otyrǵan oqıǵalardyń ózi qazirgi kúni aqparattyq qaýipsizdiktiń ózekti ekendigin kórsetedi. Budan soń, ekonomıkalyq qaýipsizdik máseleleri esepke alynyp, negizgi qaýipter retinde qarjy júıesiniń turaqsyzdyǵy belgilendi. Osymen birge aqparattyq-ekologııalyq jáne syrtqy salalardaǵy ulttyq múddeler de qosymsha engizilip otyr. Máselen, áleýmettik saladaǵy ulttyq múddeler keńeıtildi, atap aıtqanda densaýlyq saqtaý, bilim berý, áleýmettik qamtamasyz etý júıelirin jetildirýdiń mańyzdylyǵy atap kórsetildi. Sebebi qazirgi tańda áleýmettik salalardaǵy problemalardyń sheshilmeýi ártgúrli narazylyq aktsııalarǵa, azamattardyń ekstremıstik áreketterge qatysýyna yqpal etip otyrǵany málim», - dedi Ǵ. Ámirın.
Onyń aıtýynsha, zańnyń basty jańalyqtarynyń biri - memlekettik organdarynyń quzyretin jáne olardyń ulttyq qaýipsizdik salasyndaǵy ornyn naqty belgileý. Bul rette zańnyń 17 babyna sáıkes, memlekettik organdar kelisimdi qyzmet etý úshin olardyń quzyreti naqty belgilenýi tıis. «Alaıda, qoldanystaǵy zańda memlekettik organdardyń quzyreti anyqtalmaǵan. Osyǵan baılanysty zańda 30 memelkettik organnyń ulttyq qaýipsizdikti qamtamasyz etý salasyndaǵy quzyreti jáne ózara is-qımyl jasaý tártibi belgilendi», -deıdi Ǵ. Ámirın.
Budan bólek, qujatta ulttyq qaýipsizdik túrleri de qaıta qaralǵan. Sonymen qatar, zańda saıası qaýipsizdik ulttyq qaýipsizdiktiń jeke túri retinde belgilengen. «Saıası qaýipsizdik salasyndaǵy qorǵalatyn nysandar naqtylandy, olarǵa konstıtýtsııalyq qurylym, memlekettik organdar júıesi, memlekettik basqarý tártibi jatqyzyldy», - dedi Ǵ. Ámirın.
