Ulttyq qaýipsizdik komıtetiniń ókilderi tutqynǵa alǵan qarjy polıtsııasy qyzmetkeriniń isin prokýratýra qaraıtyn boldy
ASTANA. Qarashanyń 12-si. QazAqparat /Aıdar Ospanalıev/ - Ulttyq qaýipsizdik komıtetiniń ókilderi tutqynǵa alǵan Ekonomıkalyq qylmysqa jáne sybaılas jemqorlyqqa qarsy kúres agenttiginiń Almaty qalalyq departamenti bastyǵynyń orynbasary Aıdyn Janteleevtiń isin endi prokýratýra qaraıtyn boldy.
Bul týraly búgin jýrnalıstermen bolǵan aptalyq bırıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
«Bul oqıǵanyń mán-jaıy bizge belgili. Ulttyq qaýipsizdik komıtetiniń ókilderi qarjy polıtsııasynyń qyzmetkerin tutqyndaýǵa ruqsat aldy. Al qarjy polıtsııasynyń ókilderi Ulttyq qaýipsizdik komıteti qyzmetkerleriniń áreketterin zańsyz dep otyr. Osyǵan qaraı jáne osy iske qatysty tekserý jumystarynyń barynsha obektıvti bolýyn qamtamasyz etý maqsatynda keshe ǵana Bas prokýror atalmysh qylmystyq isti Bas prokýratýranyń arnaıy prokýroryna berý jóninde sheshim qabyldady. Endi bul isti arnaıy prokýror jalǵastyrady», dedi resmı ókil.
Onyń sózine qaraǵanda, tekserý jumystaryna Ulttyq qaýipsizdik komıtetiniń de, qarjy polıtsııasynyń da ókilderi aralaspaıdy. «Biz zańnyń oryndalýyn baqylaýshy, sondaı-aq tekserý men tergeý jumystaryn júrgizýge quzyrly organ retinde istiń mán-jaıyn búge-shigesine deıin tolyq tekseretin bolamyz. Tekserý jumystarynyń nátıjesi boıynsha qaı organnyń áreketiniń zańdy ekeni anyqtalady. Tekserý jumystarynyń barysy Bas prokýrordyń jeke baqylaýynda bolady», dedi N.Súıindikov.
