Ulttyq qaýipsizdik komıtetiniń alǵashqy basshysy Bolat Baekenov ómirden ótti

ASTANA. QazAqparat - Áskerı qaıratker, arnaýly memlekettik organdar ardageri, general-leıtenant Bolat Baekenov ómirden ozdy. Qaıǵyly habardy QR Memlekettik kúzet qyzmeti jetkizdi, dep habarlaıdy QazAqparat.

«Búgin uzaqqa sozylǵan naýqastan keıin elimizdiń arnaýly memlekettik organdar ardageri general-leıtenant Bolat Baekenov qaıtys boldy. Bolat Ábdirahmanuly ár jyldary QR Ulttyq qaýipsizdik komıtetin, Іshki ister mınıstrligin basqardy, Qazaqstan Respýblıkasy Qaýipsizdik keńesiniń hatshysy boldy. 1997-2001 jyldary general-leıtenant Qazaqstan Prezıdentiniń kúzet qyzmetine jetekshilik etip, vedomstvonyń damýyna zor úles qosty. Memlekettik kúzet qyzmeti general-leıtenant Bolat Baekenovtiń qaıtys bolýyna baılanysty marqumnyń otbasy men jaqyndaryna qaıǵysyna ortaqtasyp kóńil aıtady» delingen vedomstvo taratqan habarlamada.

Bolat Ábdirahmanuly1942 jyly 21 qarashada Batys Qazaqstan oblysynyń ortalyǵy Oralda dúnıege kelgen.

Táýelsizdik alǵannan keıin Qazaqstan memlekettik qaýipsizdik komıtetiniń (1992 jyldyń shildesinen bastap QR UQK) tóraǵasy bolyp taǵaıyndaldy.

1993-1994 jyldary Qaýipsizdik keńesiniń hatshysy boldy.

1994-1995 jyldary — Qazaqstan Respýblıkasynyń Іshki Іster mınıstri.

• 1997 naýryzda - Memleket basshysynyń jarlyǵymen QR Prezıdenti kúzet qyzmeti bastyǵy bolyp taǵaıyndaldy.
• 2001 jyly qurmetti demalysqa shyqqan.
• Otstavkaǵa shyqqan soń ustazdyq qyzmetpen aınalysyp, Qazaq gýmanıtarlyq zań ýnıversıteti Almaty zań akademııasyn basqardy.