Ulttyq qaýipsizdik komıteti lańkester nysanaǵa alýy múmkin barlyq obektilerdi pasporttandyrýdy bastady
ASTANA. Jeltoqsannyń 11-i. QazAqparat /Qanat Mámetqazyuly/ - Ulttyq qaýipsizdik komıteti elimizdegi lańkester nysanaǵa alýy múmkin dep tanylatyn barlyq obektilerdi pasporttandyrýdy bastady. Bul týraly búgin QR Parlamenti Senatynyń jalpy otyrysynda QR Ulttyq qaýipsizdik komıtetiniń tóraǵasy Ádil Shaıahmetov málim etti,
dep habarlaıdy QazAqparat.
«Ótken jyldar ishinde Ortalyq Azııa men buǵan shektesetin óńirler qaýipti aımaqqa aınaldy. Jaqyn kórshilerimiz lańkestik shabýyldardan tájirıbe de alýda. Aýǵanstan men Pákistandaǵy jaǵdaılardyń kúrdelenýi, Kavkaz elderindegi oqıǵalar Qazaqstan ishindegi terrorıstik táýekelderdiń artýyna sebep bolýda. Onyń ústine terrorısterdiń halyqaralyq jelisi jáne olardyń bazasy Qazaqstan shekarasyna jaqyndaı tústi. Asa alańdaıtyn taǵy bir másele, dinge senýshilerdiń radıkaldaný úderisiniń týyndaýy sebebinen birqatar óńirlerde ekstremıstik jamaǵattar anyqtaldy. Qazaqstan azamattaryn terrorıstik is-áreketterge tartý oqıǵalary da belgili boldy. Osy faktilerdiń ózi terrorızmge qarsy is-qımyldy jetildire túsýdi talap etedi», dedi Á. Shaıahmetov.
Onyń aıtýynsha, búgingi kúni respýblıkanyń barlyq óńirinde lańkestikterdiń nysany bolýy múmkin barlyq obektilerdi pasporttandyrý sharalary qolǵa alyna bastaǵan. Pasporttandyrylatyn bundaı nysandar tizimine strategııalyq nysandar, mektepter, vokzaldar, sondaı-aq halyq kóp shoǵyrlanatyn basqa da oryndar jatady. «Budan basqa UQK-de 12 memlekettik organnyń biregeı málimetter banki qurylady. Onda terrorızmge qarsy kúres máseleleri boıynsha aqparattar jınaqtalyp, óńdeledi», dedi komıtet tóraǵasy.
