Ulttyq qaýipsizdik komıteti Kaspııde qyzmetti júzege asyrý tártibin túsindirdi
«Qazaqstan Respýblıkasynyń keıbir zańnamalyq aktilerine Kaspıı teńizinde qyzmetti júzege asyrýǵa baılanysty máseleler boıynsha ózgerister men tolyqtyrýlar engizý týraly» № 11-VII QRZ Zańy kúshine endi.
Zań ulttyq zańnamaǵa halyqaralyq sharttyń normalaryn ımplementatsııalaıdy jáne Qazaqstan Respýblıkasynyń Kaspıı teńiziniń quqyqtyq mártebesi týraly Konventsııanyń (budan ári – Konventsııa) kúshine enýine ázirligin qamtamasyz etedi.
Konventsııada jaǵalaýdaǵy memleketterdiń eni 15 teńiz mıline deıingi aýmaqtyq sýlardy jáne eni 10 teńiz mıline deıingi balyq aýlaý aımaǵyn belgileý, sondaı-aq shektes jáne qarama-qarsy jatqan memlekettermen ýaǵdalastyq boıynsha óz túbi men jer qoınaýy sektoryn ajyratý quqyǵy kózdelgen.
«Qazaqstan Respýblıkasynyń Memlekettik shekarasy týraly» Zańnyń 16-babyna sáıkes qazaqstandyq kásipshilik kemelerge Qazaqstan Respýblıkasynyń Memlekettik shekarasyn birneshe ret kesip ótýge ruqsat alý talaptary saqtalǵan jaǵdaıda táýliktiń kez kelgen ýaqytynda ishki jáne aýmaqtyq sýlarǵa shyǵý quqyǵy berildi.
Zańnyń 48-babynyń 6-tarmaǵyna sáıkes aýmaqtyq sýda (teńizde) jáne shaǵyn kólemdi kemelerdegi ishki sý sharýashylyq qyzmetti júzege asyratyn qazaqstandyqtarǵa rejımdik shekteýlersiz eki mılge deıingi qashyqtyqqa teńizge erkin shyǵýǵa ruqsat etiledi. Bul rette múddeli memlekettik organdar men uıymdardyń (UQK, ІІM) tıisti usynymy qajet.
UQK jeke jáne zańdy tulǵalar demalý, týrızm jáne sport úshin paıdalanatyn qazaqstandyq shaǵyn kólemdi ózdiginen júzetin jáne ózdiginen júzbeıtin (sýústi jáne sýasty) kemelerdiń (quraldardyń) rejımdik shekteýlerdiń qoldanylýy, belgilengen akvatorııada júzýi jáne (nemese) paıdalanylýy toqtatyla turatyn Kaspıı teńizi jaǵalaýy ýchaskeleriniń tizbesin jyl saıyn belgileıdi.