Ulttyq qaýipsizdigimiz úshin halqymyzdyń sany 20 mıllıon bolýy kerek - Senat depýtaty S. Jalmaǵambetova
ASTANA. 6 sáýir. QazAqparat - Ulttyq qaýipsizdigimiz úshin halqymyzdyń sany 20 mıllıon bolýy kerek. Bul pikirdi búgin elordada «Nur Otan» HDP-da ótken «Jańarýdyń qazaqstandyq joly: demografııalyq aspektileri» taqyrybynbaǵy respýblıkalyq ǵylymı-tájirıbelik konferentsııada QR Parlamenti Senatynyń depýtaty Svetlana Jalmaǵambetova bildirdi.
«Demografııa máselesi Qazaqstan úshin óte ózekti. Birinshiden, bizdiń terrıtorııamyz óte úlken, kólemi jaǵynan 9-shy orynda. Al biraq halyqtyń sany boıynsha basqa elderden arttamyz. Jalpy bizdiń ulttyq qaýipsizdigimiz úshin halyqtyń sany keminde 20 mıllıon bolýy kerek», - dedi ol.
Halyq qalaýlysynyń aıtýynsha, elimizdiń básekege qabiletti elderdiń qataryna kirýi, ekonomıkamyzdyń damýy úshin jumysshylardyń sany basym bolýy kerek. Bul máseleni Frantsııa, Germanııa memleketteri basqa elderden jumysshy kúshin tartý arqyly, al Skandınavııa elderi óz halqyn jumysqa tartý joldary arqyly sheship otyr.
Sonymen qatar halyqtyń sanyn ósirýdiń birinshi tásili qazaqstandyqtardyń ómir jasyn uzartý, ólim-jitimdi qysqartý ekendigin basa aıtqan ol: «Ekinshiden, týý máselesin kóbeıtý qajet. Bul baǵytta elimizde birqatar jumys atqarylýda. Máselen, 2003 jyly 250 myń bala týsa, ótken jyly 370 myń bala dúnıe esigin ashty. Bul ana men balaǵa memleket tarapynan zor kóńil bólýdiń, járdemaqyny ósirýdiń arqasynda oryn alýda», - dedi.
