Ulttyq kásipkerler palatasy Úkimetke zeınetaqy jınaqtaryn ekonomıkaǵa tartýdy usynady

ASTANA. QazAqparat - Ulttyq kásipkerler palatasy Úkimet pen Ulttyq bankke zeınetaqy qoryndaǵy qarajatty ekonomıkaǵa tartýdy usynady. Bul týraly búgin Ortalyq kommýnıkatsııalar qyzmetindegi brıfıngte «Taý-ken óndirýshi jáne ken-metallýrgııa kásiporyndarynyń respýblıkalyq qaýymdastyǵy» zańdy tulǵalar birlestiginiń atqarýshy dırektory, QR Ulttyq kásipkerler palatasy Ken-metallýrgııa kesheni komıtetiniń tóraǵasy Nıkolaı Radostovets málim etti.

«Mańyzdy máseleniń biri - taý-ken salasyna qarajat tartý. Qarajat qaıda jáne ony qalaı tartý kerek? Máselen, biz Ulttyq kásipkerler palatasynda sońǵy ýaqytta Ulttyq qor qarjysyn alýǵa bola ma, bolmaı ma degen suraqty belsendi talqylap júrmiz. Al, zeınetaqy jınaqtaý qorynyń qarajatyn ekonomıkaǵa paıdalaný, paıdalanbaý týraly pikirtalastyń órbigenine 15 jylǵa jýyq boldy. Shynymdy aıtaıyn, men eńbek mınıstri bolyp turǵanda osy máseleni kótergenbiz. Ókinishke qaraı, bul qarajat ázirshe shet el memleketteriniń mindettemelerine, basqa, qazaqstandyq emes kompanııalarǵa 6-7 paıyzben qyzmet etip jatyr», - dedi N. Radostovets.

Onyń aıtýynsha, Ulttyq palata osy máseleni Úkimettiń, Ulttyq banktiń aldyna qoıyp keledi. Atap aıtqanda, palata jyl sońyna deıin zeınetaqy jınaqtaýshy qorynyń qarajatyn Qazaqstan ekonomıkasyna tartý mehanızmin ázirleý týraly usynys jasap otyr. «Men ábden senimdimin, eger bul qarajat bankterdiń, saqtandyrý kompanııalarynyń kepildiginde bolyp, qaıtarymdy jobalarǵa jumsalsa, odan ekonomıka utady», - degen palata ókili ondaı jobalardyń Qazaqstanda jeterlik ekenin tilge tıek etti.

N.Radostovetstiń aıtýynsha, Qazaqstanda ıgerýge bolatyn ken oryndary da barshylyq. Osyǵan oraı, Ulttyq palata ókili: «nege biz syrttan qarajat tartyp, ózimizdikin basqa bireýge berýge tıispiz?» degen másele kóterdi.

«Eger zeınetaqy jınaqtaryn aınalymǵa tarta alsaq, onda keleshekte zeınetke shyǵatyndar da utatynyna senemin. Bunyń tıimdiligi qazirgideı jylyna 6 paıyz emes, odan aıtarlyqtaı joǵary bolýshy edi. Qoǵam osyny túsinýi kerek: zeınetaqy jınaǵyn basqa bireýge paıdalanýǵa berýdiń qajeti shamaly. Aqsha aqshany tartady, al bizdiń jaǵdaıymyzda zeınetaqy jınaqtary jańa jumys oryndary men jańa salyqtyq túsimderdi toltyratyn edi. Sondyqtan da, biz zeınetaqy jınaqtaryn bótenge berip, sheteldik qurylymdarǵa qyzmet kórsetý arqyly qatelesip otyrmyz dep sanaımyz», - dep túıindedi ol.