Ulttyq kásipkerler palatasy týraly zań qabyldandy- Parlament
ASTANA. 27 maýsym. QazAqparat - Búgin Parlament Senatynyń jalpy otyrysynda «Qazaqstan Respýblıkasyndaǵy Ulttyq kásipkerler palatasy týraly» QR Zańy qabyldandy.
Atalǵan qujat Memleket basshysynyń byltyrǵy jylǵy Joldaýynda júktegen tapsyrmalardy júzege asyrýǵa baǵyttalǵan. Onda Elbasy halyqaralyq tájirıbelerge súıene otyryp, kásipkerlerdi palatalarǵa toptastyrýdy tapsyryp, onyń ekonomıka tıimdiliginiń mańyzdy faktory bolatynyn, osylaı istelgen jerde «myqty bıznes -myqty memleket» qaǵıdasy júzege asatynyn atap ótken bolatyn. Bul rette qujattyń maqsaty Qazaqstanda kásipkerlik sektordyń ósýi men odan ári damýy úshin ınstıtýtsıonaldyq negizdi qalyptastyrý bolyp tabylady. Osy baǵytta zań arqyly QR Ulttyq kásipkerler palatasynyń qurýmen, onyń qyzmetimen, palatanyń memlekettik organdarmen, basqa da quqyqtyq qatynastar sýbektilerimen ózara baılanys tártibi retteledi.
Qabyldanǵan zańnyń arqasynda kásipkerlik sýbektilerin shoǵyrlandyrý, memlekettik ekonomıkalyq saıasatty ázirleý jáne iske asyrý kezinde kásipkerlik sýbektileriniń memlekettik organdarymen ózara tıimdi is-qımylyn uıymdastyrý arqyly bıznes múddesiniń eskerilýi qamtamasyz etilmek.
Zańnyń tujyrymdamasyna sáıkes, Ulttyq kásipkerler palatasynyń kontınentaldyq (eýropalyq) úlgisi qalyptasady. Bul kásipkerlerdiń jalpyǵa birdeı músheligine negizdelmek. Al mundaı kontınentaldyq úlgi Frantsııa men Germanııada dúnıege kelgen. Qazir kóptegen eýropalyq elderde osy úlgi tabysty iske asyp keledi.
Qujatqa sáıkes, Ulttyq kásipkerlik palatasy óńirlik kásipkerlik palatalaryn árbir oblysta, respýblıkalyq mańyzy bar qalada, astanada qura alatyn bolady. Bul rette oblystyń, mańyzy bar qalalardyń, Astananyń aýmaǵynda bir ǵana Óńirlik kásipkerler palatasy qurylyp, jumys isteıtin bolady.
Parlament qabyldaǵan zań Memleket basshysynyń qol qoıýyna joldanady. Toqtala ketetin jaıt, búgingi otyrysta Senat «Qazaqstan Respýblıkasynyń keıbir zańnamalyq aktilerine QR Ulttyq kásipkerler palatasy máseleleri boıynsha ózgerister men tolyqtyrýlar engizý týraly» ilespe zań jobasyn birinshi oqylymda maquldady.
