Ulttyq kásipkerler palatasy eýropalyq úlgide qalyptasady - B. Saǵyntaev
ASTANA. 27 maýsym. QazAqparat - Ulttyq kásipkerler palatasy kontınentaldyq, ıaǵnı eýropalyq úlgide qalyptasatyn bolady.
Búgin Parlament Senatynyń jalpy otyrysynda «Qazaqstan Respýblıkasyndaǵy Ulttyq kásipkerler palatasy týraly» zań jobasy boıynsha baıandama jasaǵan QR Premer-Mınıstriniń birinshi orynbasary-Óńirlik damý mınıstri Baqytjan Saǵyntaev osylaı málim etti.
Úkimet basshysy orynbasarynyń aıtýynsha, Úkimet «Atameken» odaǵymen birlesip, Ulttyq kásipkerler palatasyna mindetti músheliktiń tujyrymdamalyq úlgisin ázirlegen. Soǵan oraı, aldaǵy ýaqytta Ulttyq kásipkerler palatasy Úkimettiń senimdi ári bilikti seriktesine aınalady. «Atalǵan úlgi kásibı tehnıkalyq bilim, ásirese aýyldyq óńirler men monoqalalardaǵy shaǵyn bıznesti keshendi servıstik qoldaý, syrtqy ekonomıkalyq qyzmet salalarynda memlekettik organdardyń keń ókilettikteri men fýnktsııalary qurylatyn Ulttyq kásipkerler palatasyna berýdi qarastyrady. Osylaısha, Ulttyq kásipkerler palatasy Úkimettiń senimdi jáne bilikti seriktesine aınalatyn bolady», dedi B. Saǵyntaev.
Onyń aıtýyna qaraǵanda, Ulttyq kásipkerler palatasy kontınentaldyq (eýropalyq) úlgide qalyptaspaq. Bul kásipkerlerdiń jalpyǵa birdeı músheligine negizdeledi. «Atalmysh úlgi Frantsııa men Germanııada dúnıege kelip, qazir kóptegen eýropalyq elderde tabysty iske asyp keledi», deıdi mınıstr.
