Ulttyq ıdeologııa - demokratııasyz, demokratııa - ulttyq ıdelogııasyz ómirge beıimdelýi múmkin emes - mádenıettanýshy pikiri
ALMATY. 3 jeltoqsan. QazAqparat - Buqaralyq aqparat quraldary - órkenıettik ólshem negizi. Bul jaıly mádenıettaný mamandyǵy boıynsha áleýmettik-gýmanıtarlyq pánder magıstri Araılym Shańbaeva Almatyda ótken «Tarıhı-mádenı mura jáne zamanaýı mádenıet» dep atalatyn halyqaralyq ǵylymı-tájirıbelik semınar kezinde aıtty.
«BAQ qazirgi órkenıetti elderdiń bárinde de úlken saıası kúsh bolyp sanalady. Onda belgili bir eldiń saıası, ekonomıkalyq jáne basqa salalardaǵy erekshelikterin, damýyn ózge memleketter tek BAQ arqyly belgilep baǵalaı alady. Ǵalamdyq aqparattyq júıe órkenıetti áleýmettik ómirdi bir-birimen biriktirip, tolyqtyryp, memleketterdi ózara baılanystyrady», - deıdi A. Shańbaeva. Onyń aıtýynsha, álemde demokratııanyń 500-ge jýyq túri bar desek, onyń álem elderiniń kópshiligi moıyndaǵan biryńǵaı anyqtamasy joq. Ár eldiń turmys-tirshiligine, ádet-ǵurpyna, tarıhı erekshelikterine, salt-dástúrine baılanysty demokratııa san túrli reń alady. Jalpy ulttyq ıdeologııa - demokratııasyz, demokratııa - ultttyq ıdeologııasyz ómirge beıimdelýi múmkin emes, olar tipti shıeleniste bolǵanymen de bir-birimen bite qaınasyp jatady. BAQ demokratııalyq úderisterdi qalyptastyratyn birden bir kúsh. Ol qoǵamnyń aýa-raıyn, qoǵamdyq pikirdi rettep otyrady. Qazirgi kezeńde BAQ qoǵamnyń rýhanı ólshemi ǵana emes, demokratııanyń mańyzdy salasy. Demokratııalandyrý úrdisterin yntalandyratyn da, demokratııalyq oı-júıeni qalyptastyratyn da, demokratııa mádenıetine tárbıeleıtin de BAQ bolyp tabylady.
